Насловна

Црн понеделник на градилиштата

Двајца работници загинаа, еден тешко повреден во три одделни несреќи

Двајца загинати работници и еден тешко повреден е билансот на црниот понеделник на градилиштата низ земјава. Две несреќи по паѓање од височина и еден трагичен случај со флекс-машина уште еднаш го отворија прашањето за безбедноста на градежните работници.

Како што соопшти полицијата, кочанчанецот Малиш М. (42) го загуби животот во несреќа што околу 15,15 часот се случи во куќа во кочанската населба Оризари. Малиш изведувал градежни работи на третиот кат, при што во еден момент, обидувајќи се да задржи рачна количка, паднал во дворното место од куќата. По пад од осум метри висина, кочанчанецот веднаш бил пренесен во локалната болница, но докторите констатирале смрт како последица од повредите во главата. Полицијата, истражен судија, претставник на Обвинителството и трудов инспектор извршија увид и ги истражуваат причините за несреќата.

Два часа подоцна, трагедија на улицата „Питу Гули“ во Тетово. Во двор од куќа, односно пред еден од прозорците, Шереф И. (29) со флекс-машина сечел керамички плочки.

„Во еден момент, се скршил каменот од машината и го пресекол Шереф во пределот на вратот, нанесувајќи му длабока рана“, соопшти полицијата.

Работникот итно бил пренесен во Клиничкиот центар во Тетово, каде што била констатирана смрт, која настапила како последица од обилното крварење од пресечените главни артерии. По увидот, телото на починатото момче му е предадено на семејството.

Педесетгодишен тетовец се бори за живот откако паднал од висина од 16 метри. Несреќата се случила завчера околу 14,45 часот во станбен објект во изградба на улицата „Новопланирана 3“ во Скопје. Б.А. (50), вршејќи работи на петтиот кат, изгубил рамнотежа и од работ на неоградената бетонска плоча, паднал на бетонската подлога пред објектот, соопшти полицијата. Работникот бил пренесен во Ургентниот центар во Скопје, каде што дежурниот лекар констатирал тешки телесни повреди: нагмечување на мозокот и скршен прв пршлен.

„Неговата здравствена состојба и натаму е критична“, ни изјавија вчера од КАРИЛ.

Надлежните извршија увид и истражуваат дали градежниот работник имал соодветна заштита или, пак, до несреќата дошло по негова вина и невнимание. (Г.А.)