Насловна

Нелегалното оружје ќе се лови со нова опрема

Опрема и технички средства во вредност од 70.000 евра доби Министерството за внатрешни работи како помош од СЕЕСАК (Клириничка куќа на Југоисточна и Источна Европа за контрола на малото лесно оружје), УНДП и Европската комисија. Донацијата е наменета за градење на капацитетите за контрола на мало и лесно оружје, односно за ефикасна борба против нелегалното оружје.

„Овој софистициран систем што го доби МВР претставува своевидна револуција во областа на идентификацијата на траги од огнено оружје при што ни овозможува автоматско пребарување на трагите од испуканите чаури, преку напоредно градење соодветна база на податоци за малото и лесно оружје“, рече министерката Гордана Јанкулоска.

Таа потврди дека интересот во последната акција на полицијата за добродоволно предавање на нелегалното оружје и за легализирање на оружјето кое може да се поседува, бил многу мал. Во периодот од јуни 2010 година до јуни 2011 година, биле предадени само 39 парчиња оружје и 2.295 парчиња муниција. Поднесени биле 563 барања за регистрација, од кои 107 веќе биле уважени. (Г.А.)