Приведен кандидат за пратеник на ДУИ

Кандидатот за пратеник на ДУИ во „шестката“, Вулнет Ахмети, вчера во Тетово бил приведен, без да има притоа какво било објаснување. Од партијата реагираат дека, наспроти ова, досега не е уапсен ниту еден од оние кои во неделата ги предизвикале инцидентите.

„Случувањата во неделата ја нарушија довербата на граѓаните -Албанци во институциите на државата, посебно во МВР. Ги повикуваме властите да се ангажираат и да преземат мерки за враќање на довербата како предуслов за обезбедување мир и нормално функционирање на земјава“, изјави Ермира Мехмети, портпарол на партијата на Али Ахмети.

Таа ги потврди најавите за поднесување жалби до ДИК за целата ИЕ во шестката како и за Општина Сарај.

„Кон крај сме со подготовките за поднесување на жалбите до ДИК и, иако има околу 150, ќе стигнеме навреме во законскиот рок да ги доставиме“, истакна Мехмети. Покрај жалбите за сите спорни избирачки места, ќе достават и единствена жалба на Шестата изборна единица како целина. Таа уште еднаш го повика јавниот обвинител да поведе постапка за високи членови и функционери на ДПА, меѓу кои и за Даут Реџепи Лека, кој во неделата во Порој лично го држел во заложништво членот на ДИК Субхи Јакупи. (Св.У.)