Прегласувањето ќе ги реши дилемите кој победи во албанскиот кампус

Со повторување на гласањето, коалицијата на ВМРО-ДПМНЕ од 64 ќе остане покуса за едно - две места

Катица Чангова

Прегласувањето на 15 јуни ќе ги реши дилемите за победникот во албанскиот кампус. Во моментов се' уште не се знае која од партиите ДУИ или ДПА е победник на парламентарните избори. Во Државната изборна комисија потврдија дека ќе има повторено гласање на 22 избирачки места. Целиот процес со приговори и жалби, се' до изјаснување на Врховниот како последна инстанција треба да финализира до крајот на неделава. Од ДИК изјавија дека нема да соопштуваат по колку мандати освоиле политичките репрезенти се' додека не добие чиста ситуација од гласањето.

Според првичните резултати од добиени гласови што ги објави ДИК, разликата на ниво на држава е многу тесна, односно 110.000 спрема 101.000 гласови во корист на ДУИ. Некои неофицијални партиски пресметки прогнозираат дека и ДУИ и ДПА би имале по 13 мандати. Но, со повторено гласање, во Втората и во Шестата изборна единица постои можност за прокнижување по уште еден мандат, но не се знае на чие партиско конто. Извесно е само тоа што ДПА е во блага предност откако лидерот на ПДП најави постизборно спојување, што значи дека партијата на Мендух Тачи неофицијално има 14 пратеници.

Вчера до 19 часот истече рокот од 48 часа по завршувањето на гласањето што партиите го имаат за поднесување на приговори до ДИК за нерегуларности на гласачките места.

Во Државната изборна комисија потврдија дека сигурно ќе има повторено гласање во 22 изборачки места каде што имаше повеќе од тричасовни прекини во процесот. Затоа изборните резултати ќе бидат поништени. Станува збор за прекини регистрирани во неколку избирачки места во Општина Сарај, потоа на по две гласачки места во Дебар и во Желино. Нарушувања на избирачкиот процес имаше и во Општина Брвеница, во Чучер Сандево, во Гостивар во две избирачки места и во сите осум места во Општина Арачиново. До вчера во 13 часот во ДИК немаше документирано ниту еден приговор, а партиите вообичаено го чекаат последниот рок.

Премиерот и идниот мандатар за состав на нова влада, Никола Груевски, изјави дека ќе го чека повторувањето на гласањето, па дури потоа ќе се конституира Собранието и ќе се составува влада. Крајниот рок за нејзин избор е 6 август. Груевски е пред дилема дали да остане во коалиција со ДПА и како да го одбегне влошувањето на етничките односи, ако ДУИ и овој пат како победник од албанските партии остане надвор од власта.

Меѓутоа, листата на гласачки единици каде што ќе има прегласување не е конечна. Се очекува списокот да се прошири откако ДИК ќе ги разгледа партиските приговори.

Најголемиот број нерегуларности се случија во албанските средини, па партиите од албанскиот блок најавија обжалување на процесот. ДПА работи на приговорите и се очекуваше да ги прецизира спорните места до вчера попладне. ДУИ веќе знае каде ќе го обжали гласањето. Партијата на Али Ахмети ќе бара прегласување во Тетово, во Шестата изборна единица каде што ДПА победи со 30 проценти предност во однос на ДУИ. Од партијата на интегративците очекуваат прегласувањето да ја даде вистинската слика за расположението на електоратот. Лидерот на ДПА, Мендух Тачи, не се согласува со повторување на изборите во Тетово.