Дијаспората сака и уставно име и ЕУ

Милошоски ги повикува САД да лобираат за Македонија

Да се зачуваат уставното име и идентитетот на Македонија, а воедно да се напредува за влез во НАТО и во ЕУ, преферираат од Обединетата македонска дијаспора (ОМД), организација на иселеници во САД.

„Ние не сме дел од кампањата за прекинување на преговорите со Грција, но го поддржуваме тој став. Треба да се зачуваат уставното име и идентитетот“, изјави Мето Колоски, претседател на ОМД, за време на посетата на Македонија. Тој со себе води 18 советници на американски конгресмени и 13 невладини претставници од Турција.

Колоски притоа повика да се прекинат преговори��е и да се почне постапка во рамките на ОН за менување на Резолуцијата 817 во делот за името за отстранување на референцата БЈРМ.

Тридневната посета на делегацијата е целосно финансирана и спонзорирана од Турската коалиција на Америка, со која ОМД има стратегиско партнерство.

Линкен Мек Керди, претседател на Турската коалиција, вели дека во САД нема доволно познавање за Македонија и Турција, а во споредба со македонското и турското лоби, грчкото и ерменското се многу повлијателни.

„Во САД не се доволно запознати со Македонија и Турција и лоби-грубите не се доволно организирани наспроти силното лобирање на Американците со грчко и ерменско потекло. Затоа кај Американците постои наклонетост кон грчките и ерменските ставови за историјата“, изјави Мек Керди. Прашан за името, Мек Керди вели дека не е доволно мудар да даде совет, но смета дека е потребно што повеќе луѓе да се запознаат со македонската вистина за спорот, во што може да помогнат и помагаат иселеничките организации на Македонците. На тој начин, додава тој, ќе се создаде атмосфера за решавање на проблемот.

„САД можат само да ги охрабрат Грците и Македонците да го решат проблемот и да одат напред оти и двете земји имаат свои проблеми, со кои се соочуваат и треба да ги надминат“, рече Мек Керди.

Делегацијата имаше средба со министерот Милошоски на која тој ги поздравил добрите пријателски односи меѓу Македонија и САД, кои, според него, ги карактеризира висока соработка и меѓусебно разбирање, континуиран политички дијалог и стратегиско партнерство во рамките на меѓународните мировни мисии. Притоа, го искажал и очекувањето за уште позасилена поддршка во претстојниот период и отворено лобирање од САД, вклучително и од претставниците на американскиот Конгрес, во рамките на Алијансата, за што поскоро ефектуирање на поканата за членство на Македонија во НАТО на Самитот во Лисабон во ноември 2010 година. (МИА)