„Битолски Монмартр“ на вересија

„Не смееме да дозволиме да пропадне поради немање пари“, вели Коста Хаџиантоновски

Битола - „Малиот битолски Монмартр“ уште еднаш широко ги отвори вратите за младите ликовни творци од светот на почетокот на 29. издание на оваа ликовна манифестација. Годинава посебен гостин на Монмартр ќе биде 16-годишната Дејана Бачко од Нови Сад, која поради недостаток на горни екстремитети, црта со нозе. Таа ќе другарува и ќе ги претстави своите оригинални ликовни творби во Битола. Но, не само економската криза туку и политиката уште повеќе го стегнаа обрачот околу оваа значајна ликовна колонија, па само четири дена пред почетокот организаторите се пожалија дека сметката им е сосема празна. Ветените 4 илјади евра од Министерството за култура се' уште не стасале, а Општина Битола веќе трета година не издвојува ниту денар за оваа светски етаблирана манифестација за која со радост се прикажува и се пишува дури и во далечните Кина и Хонг Конг.

„Не мешајте ја политиката во „Малиот битолски Монмартр“. Политичарите да си ја гледаат својата работа, а нас да не остават намира. Кај нас политика е четката, бојата и другарувањето“, вели Коста Хаџиантоновски, творец на Малиот битолски Монмартр.

Годинава, финансиската конструкција за оваа манифестација ќе се обидат да ја затворат со спонзорства. „Не смееме да дозволиме фестивалот да ни пропадне поради немање пари, затоа што со тоа ќе пропаднат и 29 години работа и традиција. Општина Битола три години и' нема доделено средства за нашата колонија. Фестивалот го почнуваме на вересија. И она што ни го ветија од Министерство не е доволно. Имаме 600 пансиони по 25 евра за сместување на децата“, вели Хаџиантоновски.

Тој го повика битолскиот Совет да даде поддршка за опстанок на манифестацијата.

На годинешниот ликовен фестивал во Битола ќе учествуваат 50-ина деца од 30 земји од светот . Според организаторите, првите гости ги очекуваат в сабота кога во Битола пристигаат годинешните добитници на Гран-при наградата – учениците од уметничкото училиште од Трабзон, Турција, како и гостите од Хонг Конг, Кина, Унгарија, Украина, Белорусија, Романија, Бугарија, Чешка и др. В недела ќе биде отворена и ликовната изложба „Битола 2010“ на која поради ограничениот простор во галеријата „Магаза“, место избраните 1.200, ќе бидат презентирани само 600 детски творби што пристигнаа на конкурсот. Учесниците на „Малиот битолски Монмартр“ освен во Битола, ќе творат и на ликовните каравани во Охрид и во Крушево. (А.Б.)