Поглед

Приказни за патиштата

Даниела Трпчевска

Министерката за внатрешни работи, Гордана Јанкулоска, и првиот човек на Агенцијата за државни патишта, Наташа Волкановска, завчера дојдоа, разгледаа и заминаа од кобниот мост кај Катланово, каде што еден ден пред тоа, во длабоката бездна животот го загубија петмина битолчани, меѓу кои и две тригодишни деца.

Ваквите прошетки на надлежните по критичните црни сообраќајни точки во земјава можат со денови да се бројат и пак да не се добројат. Арно ама, ефектите од тоа никаде ги нема!

Додека Јанкулоска апелираше возачите да внимаваат и побавно да возат, одговорната за патиштата не даде ниту еден конкретен одговор зошто делницата кај Катланово е страв и трепет за возачите, зошто никој не ги закрпува дупките и не ги оправа улиците кои се во мизерна состојба и молат за реконструкција.

Повикувајќи се на некој акционен план што е во тек, таа пред новинарите не остави впечаток дека некој ќе ги засука ракавите и ќе направи детална анализа и процена зошто автопатот пред тунелот е правен надолно како скијачка патека, што е тоа што ги залажува возачите да возат брзо и да ја изгубат контролата по излезот од тунелот, каде што речиси секоја недела има некоја непријатна случка и дали можеби немањето заштитна ограда на делот од патот е уште една дополнителна опасност, која некого може да однесе во амбис и во сигурна смрт.

Волкановска место да даде цврсти ветувања дека ќе направи се' за делницата кај Катланово да не се вбројува повеќе меѓу 137 кобни точки во сообраќајот, зборуваше за некакви пропаднати 30-ина години во кои не било мрднато со прст. Оваа несреќна изјава не зборува ништо друго, туку дека надлежните се' уште живеат во минатото.