Сопартијците го подметнуваат грбот за премиерот

Оливера Војновска

Во моменти кога парламентот расправаше за Законот за антидискриминација, премиерот и партиски шеф на Силвана Бонева, Никола Груевски, и' го испрати (преку неговиот Кабинет) фамозниот допис од Брисел. Потоа спокојно продолжил со обврските од набиената дневна агенда. На Бонева и' препуштил во нејзината собраниска канцеларија да одлучи дали ќе се прифати сугестијата на еврокомесарот Штефан Филе во Законот експлицитно да биде наведена сексуалната ориентација. Премиерот едноставно оставил Бонева и пратениците самите да се определат, секој според сопственото убедување.Така што, тој сега нема никаква одговорност за Законот. Излегува дека најголемиот виновник е Бонева. Таа, пак, лично не се чувствува како колатерална штета и смета дека целата работа погрешно се интерпретира.

Во слична ситуација се доведе и спикерот на парламентот, Трајко Вељановски, кој реши да го подметне грбот и да објаснува дека писмото од европарламентарците воопшто не го добил, бидејќи било испратено на Интернет-адреса што тој не ја користел.

Колку во домашната јавноста, но и кај дипломатите поминуваат ваквите приказни и може ли премиерот да излезе чист од овој скандал? Директорката на Македонски центар за европско образование, Лидија Димова, вели дека македонскиот премиер е одамна прочитан кај странците. „Премиерот може да се извлекува колку што сака, ама тоа нема да му помогне. Приказната е проѕирна и очигледно е дека Бонева доброволно се жртвува за Груевски. Владата прави се' спротивно од препораките на ЕУ и Брисел континуирано и' удира шлаканици. Сега веќе официјалните личности од ЕУ и од ЕК не го кријат тоа, туку многу отворено го кажуваат. Многу сум задоволна што решија да не молчат“, вели Димова.

Потпретседателот на Собранието, Јани Макрадули од СДСМ, вели дека Груевски е премиер и морал да и' каже на јавноста дека има такво писмо од Брисел. „Тоа што го пратил до Бонева е најдобар доказ дека не го почитува Собранието како институција. Вељаноски треба да побара појаснување од премиерот зошто не му го испратил нему писмото. Очекувам да му постави такво прашање на седницата за пратенички прашања“, вели Макрадули.

Тој е убеден дека и Бонева и парламентарниот спикер се подметнуваат доброволно на штета на сопствениот углед за да го заштитат Груевски. „Со ваквото однесување на премиерот го губиме кредибилитетот во европските институции. Тој го прави тоа свесно, бидејќи единствената работа за која се грижи е неговиот рејтинг“, смета Макрадули.

Политичкиот аналитичар Ибрахим Мехмети вели дека ова е уште еден пример што зборува за исклучително нискиот демократски капацитет на македонските институции и личностите кои раководат со нив. „Начинот како се одвива комуникацијата со Европскиот парламент зборува за несериозноста и недостаток на транспарентност на надлежните државни институции. Имаме повеќе заталкани писма од Брисел, а од целата приказна произлегува заклучокот дека ни недостасува демократско однесување и добро владеење. Недозволиво е да се премолчуваат информации. Случајот е сериозен и не верувам дека некој ќе го прифати објаснувањето кое се сведува на чисто техничко препраќање на писмата од Кабинетот на премиерот кај координаторот на пратеничката група. На ваков начин само си ги деградираме нашите изгледи да направиме некаков чекор кон ЕУ“, вели Мехмети.

Премиерот Груевски и вчера одбегна да даде поконкретна и попрецизна информација за писмото на еврокомесарот Филе, нагласувајќи ��ека нема дополнителен коментар од тоа што веќе било кажано од неговиот Кабинет.