Тројца претседатели бараат дијалог во Албанија
Специјално за „Утрински весник“
Кенан Мимидиноски
Тирана - Актуелниот албански претседател, Бамир Топи, на заедничка средба со експретседателите Александер Мојсиу и Реџеп Мејдани, побараа од власта и од опозицијата да преземаат активности за воспоставување итен политички дијалог со цел да се надмине политичката криза во земјата, а со тоа и да се зачекори кон патот на европските интеграции.
Оваа порака доаѓа во момент кога по одлуката на Изборниот колегиум и Централната изборна комисија победникот за градоначалник на Тирана, Лулзим Баша, и официјално седна на градоначалничката фотелја. Опозицијата се' уште смета дека Баша со манипулации на институциите дошол на власт .
Топи, Мојсиу и Меидани укажуваат и на барањето на ОБСЕ и другите европски структури дека без дијалог нема да има напредок, односно политичкиот инает многу ќе ја чини Албанија.
Лидерот на десницата и актуелен премиер, Сали Бериша, по завршувањето на изборниот процес, оцени дека сега кога е и Тирана на Демократската партија, опозицијата предводена од социјалистите треба да сфатат дека треба да се почитува гласот на народот.
Но, лидерот на опозицијата, Еди Рама, и натаму на средбите со меѓународните претставници укажува дека локалните избори биле манипулирани онака како што тоа се случило и за време на парламантерните избори пред две години.
Опозицијата преговара со меѓународниот фактор проблемот околу резултатите да биде на експертиза и во Венециската експертска меѓународна комисија.
Поради бојкотот на опозицијата, парламентот на Албанија не може да донесува клучни закони бидејќи власта нема двотретинско пратеничко мнозинство. Во една ваква состојба, реформите тешко дека може да се спроведуваат, но претставуваат закана и за странските инвестиции, оценуваат овдешните аналитичари. |
