Млади архитекти ќе осмислуваат нови живеалишта за ЗОО

Се преговара за набавка на фламинга, слон и жирафа

Деспина Трајковска


И покрај метежот и рекордниот број посетители во ЗОО, кој неделно достигнува дури и до 10.000, надлежните не прекинуваат со активностите за ревитализација на градината и зголемување на животинскиот фонд. Од вчера Зоолошката градина официјално соработува со Факултетот за архитектура и дизајн при Американскиот колеџ, чии шестмина најдобри студенти ќе изработат проект за нов ѕверовник. Истовремено, ЗОО е во исчекување на изборот на изведувач и дообезбедување финансии за изградба на нови живеалишта за морски лавови и фламинга, како и за слон и за жирафа. За набавка на овие животни директорот на ЗОО Дане Кузмановски интензивно преговара со збратимените зоолошки градини.

Неделава, сепак, надлежните се концентрирани на соработката со идните архитекти. Шест од нив се очекува да го изработат проектот за новиот ѕверовник за десетина дена, во чиј состав, но, сепак, како посебен објект ќе има и нов терариум и кафуле, а ќе се изведе и аквариум. Еден од студентите замислил и изградба на подводен тунел. Овој проект за идните архитекти ќе претставува завршен испит. Идејата на надлежните од ЗОО и младите архитекти е готовиот проект потоа да го понудат на заинтересирани донатори што би ги извеле градежните работи во текот на наредната година. Не е исклучена идејата и за други готови проекти ЗОО да обезбеди пари за изведба преку аукции.

Инаку, организирањето роденденски забави во едукативниот центар и во летниковцот во градината, кој се дава на бесплатно користење, е само дел од комерцијалните услуги во Зоолошката. Наскоро во непосредна близина на влезот ќе бидат поставени два шанка како катче за одмор и освежување, а веднаш до него ќе се отвори и патека за прошетка со пони-коњчиња, со кои посетителите ќе можат да се сликаат.

„Сигурен сум дека сиве овие содржини ќе придонесат за популација на ЗОО, која во изминатиот период е посетена како никогаш досега. Веќе наредната година очекувам да може да се вршат и вечерни посети и прошетки, бидејќи конечно, по десетици години постоење ќе инсталираме улично осветлување“, вели директорот Кузмановски, кој планира да изврши и целосна замена на електричните инсталации стари над 50 години. Во план е и поставување на комплетен видеонадзор со цел да се спречат посетителите кои несовесно се однесуваат при посетата на Зоолошката. Пешачките патеки целосно ќе се покријат со бехатон.