Денеска во Македонија почнува Светското јуниорско првенство во ракомет за жени
Се повреди Елена Георгиевска, неизвесен нејзиниот настап на првата средба против Австралија
Нашата земја во овие жешки јулски денови ќе биде домаќин на еден голем ракометен настан. Имено, од денеска па се до 3 август, во четири градови Скопје, Охрид, Гевгелија и Виница ќе се одржи Светското јуниорско првенство во ракомет за жени. На овој голем самит ќе земат учество 20 репрезентации кои се поделени во четири групи. Групата А, која ќе се игра во главниот град ја сочинуваат селекциите на Романија, Словенија, Унгарија, Германија и Исланд. Во групата Б, која е сместена во Гевгелија, ќе бидат екипите на Данска, Црна Гора, Казахстан, Јапонија и Ангола. Во групата Ц, чиј домаќин е градот Охрид, и која за нашите љубители на ракометот е интересна затоа што во неа се наоѓа и нашиот национален тим покрај репрезентацијата на Македонија, се наоѓаат и тимовите на Јужна Кореја, Хрватска, Бразил и Австралија, и во последната група Д, со седиште во Виница, за место во втората фаза ќе се борат репрезентациите на Шпанија, Франција, Аргентина, Тајпеј и Алжир. Мечевите од првата фаза кои започнуваат денеска ќе траат до 26 јули, кога завршува првата фаза на првенството.
Во втората фаза ќе се пласираат трите првопласирани селекции од четирите групи. Тие ќе формираат две групи М1 и М2 од по шест репрезентации кои во битката за висок пласман ќе се преселат во Скопје и Охрид.
Најслабо пласираните селекции (четвртите и петтите)од групите ќе формираат две нови групи П1 и П2, во кои ќе се најдат по четири тимови и тие во Гевгелија и Виница ќе разигруваат за пласман од 13 до 20 место на Светското првенство.
Главниот спектакл на првенството ќе се одржи во Скопје, односно новата сала Борис Трајковски, каде што на 2 август ќе се одиграат полуфиналните мечеви во кои ќе се сретнат двете првопласираните екипи од групите М1 и М2. Големото финале ќе се одигра на 3 август со почеток во 19.30 часот, а во 17 часот истиот ден, ќе се одигра натпреварот за третото место на Светското првенство.
Инаку, интересно е дека бранител на трофејот од првенството кое што се одигра пред три години во Чешка, селекцијата на Русија, не се најде на завршницата, бидејќи Русинките загубија од тимот на Црна Гора во квалификации. Нашиот тим ќе се обиде во третиот обид да го поправи најдобриот пласман досега, а тоа беше осмото место на Светското првенство кое што се одигра во 2003 година. Дебито го имавме во далечната 1995 година, кога на Светско првенство во Бразил го поделивме од 17-20 место. Главната цел пред почетокот на првенството на нашиот Стручен штаб е македонскиот национален тим да ја помине првата фаза, а за таа цел ќе ни бидат неопходни најмалку две победи во групата. Селекторот Новко Георгиевски смета дека оваа цел е достижна, и верува во квалитетот на неговите избранички. „На сите мечеви треба и мора да одиграме максимално ангажирано и пожртвувано. Значи нема опуштање ниту потценување на противниците. Оваа констатација посебно се однесува на првиот натпревар на првенството, а тој е против аутсајдерот во групата тимот на Австралија. Ние ќе се обидеме да направиме изненадување, и покрај тоа што ќе ни биде многу тешко. Сепак, на ваквите турнири се е можно, а ние веруваме во нашиот квалитет“, заклучи Георгиевски. Тој најави дека неговите соработници внимателно ќе ги следат настапите на конкурентските тимови од групата и врз основа на добиените сознанија од нив нашата репрезентација ќе ја поставува тактиката за следните мечеви во групата. Инаку, во Стручниот штаб на Георгиевски, се наоѓа и тренерот Крсто Петрушевски.
Сепак, на еден ден пред почетокот на шампионатот од Охрид, пристигна првата лоша вест за нашиот тим. Имено, на последената контролка на македонската репрезентација се повреди нашата најдобра ракометарка Елена Георгиевска и сега е неизвесен нејзиниот настап на СП. Георгиевска како што дознаваме, ја обнови повредата која веќе подолго време ја измачува ракометарката на Кометал ЃП и од неодамна членка на сениорскиот тим на Македонија.
Инаку, синоќа во Античкиот театар во Охрид, се одржа ждрепката за претстојното Европско сениорско првенство во ракомет за жени, кое од 2 до 14 декември оваа година ќе се одржи во нашата земја. На ждрепката ушествуваа 16 селекции, кои беа поделени во четири групи односно шешири. Нашиот тим се најде во третиот шешир заедно со репрезентациите на Шпанија, Австрија и Данска. Во првиот беа Норвешка, Русија, Франција и Германија. Во вториот Унгарија, Шведска, Хрватска и Португалија, а во четвртиот екипите на Украина, Србија, Белорусија и Романија. |
