Министерот Маневски најлошо оценет од јавноста

Според анкетата на ИРИ, 50 отсто од испитаниците сметаат дека политичката состојба е мирна

Билјана Јовановска


Министерот Михајло Маневски, премиерот Никола Груевски и министерката Гордана Јанкуловска, се тројцата членови на Владата што оставиле најлош впечаток кај граѓаните. Според последното истражување направено од Интернационалниот републикански институт (ИРИ), Маневски води на негативната листа со 29 отсто, потоа следува Груевски - со 23 отсто и Јанкуловска со 20 отсто. Интересно е дека 11 отсто од испитаниците немаат став за ова прашање, а ист толкав процент негативно го оцениле министерот Бујар Османи, додека Муса Џафери и Џелал Бајрами имаат по 10 отсто, министерот за образование Никола Тодоров - 9, потоа осум отсто од анкетираните лошо мислење имаат за министрите Фатмир Бесими, Миле Јанакиевски и Абдуалади Адеми, додека Зоран Ставревски е зад нив, со само еден процент помалку. Дури седум члена на Кабинетот на Груевски - Неџат Јакупи, Зоран Коњановски, Антонио Милошоски, Елизабета Милевска, Љупчо Димовски и Веле Самак, заработија негативни оценки од шест проценти од анкетираните. На обратното прашање - кои министри ги издвојуваат како најдобри - со 35 отсто води Никола Груевски, Гордана Јанкуловска е зад него со 29 отсто, Антонио Милошоски со 25, а 23 отсто од анкетираните немаат став.

Секој трет испитаник, или 33 отсто се задоволни од исходот на претседателските избори, а процент на оние што се многу незадоволни е дури 42. На прашањето дали со контролата на власта на сите нивоа Владата е поуспешна во решавањето на спорот за името со Грција, 50 отсто негативно се изјаснија, што е зголемување од цели 13 отсто во споредба со истражувањата од април минатата година. Дека е лошо кога една партија ја има целосната власт мислат 51 отсто, 30 отсто ценат дека е добро, а 19 отсто не знаат.

Гледано во споредба со изминатите десет години, кај јавноста се зголемува довербата во Рамковниот договор - сега изнесува 53, а во 2001 година - 49 отсто, а се опаѓа и бројот на оние што му се спротивставуваат на овој документ - бил 43, а сега е 37 отсто, додека процентот на оние што не одговараат или немаат став е 11. Сега 54 отсто од населението смета дека Рамковниот договор ќе ја направи Македонија постабилна, додека негативен став имаат 34 отсто, а 8 отсто не знаат.

Во анкетата на ИРИ испитаниците се изјаснувале и за сегашната општа политичка состојба во држава - 43 отсто велат дека е несигурна, а 50 отсто ја оценуваат како мирна. Генерално, граѓаните не знаат - 76 отсто која е разликата во системот на гласање со отворени и со затворени листи, само 16 проценти се запознати, а 9 отсто не одговориле. Во однос на поддршката на реформските активности на Владата, 50 отсто позитивно одговориле, 36 отсто имаат негативно мислење, а бројот на неодлучните и на оние што не одговориле е ист - по 7 отсто. Во јавноста расте и ставот дека Владата е нетранспарентна - така мислат дури 55 отсто (во декември овој процент бил помал - 48), како транспарентна ја оценуваат 36 отсто, а немаат одговор 8 отсто од испитаниците.