Скопјани ја игнорираат жолтата бариера на „Партизанска“
Во Градот сметаат дека поминало доволно време за навикнување, а сега на потег е сообраќајната полиција
Сања Наумовска
Скопските возачи не ги почитуваат жолтите гумени ленти на булеварот „Партизанска“. Бариерите, кои неодамна ги постави Градот Скопје за обезбедување на лентата за автобусите од јавниот превоз, засега не ја вршат својата функција. Наместо да обезбедат побрзо и поефикасно движење на автобусите, тие практично го истиснаа ЈСП од нивната лента. Сега, жолтата лента на „Партизанска“ ја користат сите кои сакаат да запрат или да се паркираат на тротоар.
Во отсуство на совест кај возачите, но и на казни од сообраќајната полиција, скопјани негодуваат дека на овој начин дополнително си ги уништуваат возилата. Велат дека тротоарите на „Партизанска“ се единственато паркиралиште кое им е на располагање, блиску до домовите, пазарот и трговскиот центар.
Во Градот Скопје, пак, велат дека жолтите ленти мора да си ја вршат функцијата, да му овозможат на ЈСП слободно да сообраќа по својата лента. Градските власти сметаат дека граѓаните се доволно и навремено информирани за важноста на проектот, поминало доволно време за навикнување, а сега на потег е сообраќајната полиција. Сите кои го попречуваат јавниот сообраќај мора да бидат казнети поради тоа што од функционирањето на жолтата лента зависи воведувањето на АЛВ-системот.
Во Градот се категорични - жолтите гумени бариери ќе продолжат да се поставуваат и понатаму на булеварите, според предвидената динамика. Ќе ги има, покрај на „Партизанска“ кај Буњаковец и на делови од улиците „Кочо Рацин“, „Димитрие Чуповски“ и „11 Октомври“. Препреките се изработени од жолта пластифицирана гума, долги се еден метар, а високи 11 сантиметри. На средината имаат флуоресцентна лента, што значи дека се распознаваат и ноќе. Набавени се од фирмата „Бојта“, а за нив Градот плати 50.000 евра.
„Пред да почнеме да ги следиме автобусите дали го почитуваат возниот ред, мораме да им обезбедиме услови непречено да сообраќаат по булеварите. Засега има многу позитивни реакции од возачите на ЈСП, но и од граѓаните кои користат јавен превоз“, велат во Градот. Оттаму најавуваат и анализа дали возачите ќе треба дополнително да се едуцираат за корисноста од жолтите бариери или пак несовесните веднаш ќе бидат казнувани. |
