И по три недели, случајот со Бошкоски се' уште е на почеток

Иако од апсењето и притворањето на лидерот на Обединети за Македонија, Љубе Бошкоски, мината цели три недели, истрагата се' уште не е мрдната од мртва точка. Истражниот судија се' уште не го повикал ниту Бошкоски ниту неговиот бранител Љубомир Михајловски за да им ги презентира доказите што го товарат лидерот на ОМ за незаконско финансирање на предизборната кампања и за злоупотреба на службената должност.

„И во текот на вчерашниот ден се интересирав кога ќе бидам повикан од истражниот судија. И самиот не знам кога ќе ми бидат презентирани доказите со кои се осомничува мојот клиент“, вели адвокатот Михајловски.

Обвинувањата на сметка на Бошкоски се во насока на тоа дека на 6 јуни во скопскиот ресторан „Воденица“ примил 100.000 евра. Според МВР, тој со примените пари, наводно, требало да ги покрива трошоците што ги имала неговата партија во текот на изборната кампања.

Како ќе се одвива натамошниот тек од постапката, засега е неизвесно. Бошкоски обвини дека станува збор за по��итички монтитран процес и при неговото апсење одби да потпише записник за одземени предмети, тврдејќи дека стоте илјади евра ставени во кеса не биле негови.

За случајот со Љубе Бошкоски се заинтересира и Хелсиншкиот комитет за човекови права, кој констатирал несоодветен лекарски третман на притворениот, а во иднина фокусот ќе бил насочен и на начинот на кој лидерот на ОМ бил приведен. (Љ.С.)