Полицајците вежбаа пред Јанкулоска да не тепаат

Три недели откако специјалец претепа 22-годишно момче, „алфите“ нудеа професионално лице

Горан Адамовски


Дваесетина дена откако полициски специјалец претепа до смрт 22-годишно момче, припадниците на МВР пред очите на министерката за внатрешни работи, полицискиот врв и медиумите во земјава, демонстрираа како работат на терен. Легитимираа, апсеа криминалци, насилници што тепаат жени, се бранеа од луѓе што со ножеви се обидуваа да се спасат од приведување. Применувајќи ги вежбите беспрекорно, „алфите“ се обидуваа да остават впечаток на добро истренирана екипа, која во ниту еден момент не ги загрозува човечките слободи и права и не ги прекршува полициските норми и правила.

Дваесетминутното сценарио во Центарот за обука на МВР во Идризово предвиде седум вежби. Во сите седум исценирани ситуации, припадниците на Мобилната единица за борба против уличниот криминал постапуваа најкоректно колку што дозволуваа ситуациите. Најнапред им се претставуваа на „жртвите“, на ку��турен начин бараа од нив да се легитимираат, а доколку даваа отпор или, пак, напаѓаа, го совладуваа без притоа да употребат прекумерна полициска сила. Поточно, воопшто и не го удираа противникот. Не го ни легнуваа на земја, како што беше случај со дел од апсењата што беа интересни за јавноста. Според министерката Јанкулоска, која задоволно ги следеше вежбите, невозможно е да се предвидат сите ситуации на терен, а реакцијата на полицајците зависи дали и колку лицето кон кое се постапува дава отпор, околностите при кои се извршува приведувањето и сл.

Физички вежби, трчање, боречки вештини, кондициски подготовки се дел од секојдневните обврски на полициските специјалци. Една третина од времето „алфите“ го минуваат вежбајќи како да се справат со одредени ситуации на терен. Бројките покажуваат дека во првите месеци од годинава тие извршиле над 5.000 легитимирања, а привеле повеќе од 1.500 лица. Но, поплаките на граѓаните најчесто се на бруталноста на „алфите“, за кои се зборува дека „прво тепаат, а потоа прашуваат“.

„Полицајците имаат можност за дополнителен тренинг штом проценат дека има потреба за тоа. Најважно е да стекнат искуство за процена на ситуацијата на терен и да реагираат соодветно без да ја прекршуваат етиката и правата на граѓаните“, вели министерката.

Етиката и правата на граѓанинот грубо беа прекршени пред повеќе од три недели на плоштадот „Македонија“ во центарот на Скопје кога полициски специјалец претепа до смрт 22-годишно момче. Убиството беше повод за секојдневни протести на младите, кои бараат целосно расчистување на случајот и одговорност од сите инволвирани. Меѓу другото, тие бараат средба и со првата полицајка, која вчера рече дека ќе ги прими нивните претставници. Додека се чека разрешница на трагичниот случај, полицајците ќе се обидуваат да ги уверуваат своите надлежни и јавноста дека не ги прекршуваат своите овластувања кога излегуваат на терен.