Митриновски нема да избега од одговорноста за Бајруш?

Претседателот на Судскиот совет, Васил Грчев, вчера ги потврди информациите на „Утрински весник“ дека двајца апелациони судии поднеле оставка. На утрешната седница на Советот ќе бидат констатирани оставките на Јордан Митриновски од претседателската функција во скопска Апелација и на Исмаил Лимани од судската. Но, како што појасни Грчев, без да споменува конкретни имиња, тоа не значи дека ќе биде прекината постапката за утврдување на одговорноста на едниот од нив, кој нема да биде повеќе претседател, но останува судија, за случајот со притворот на Бајруш Сејдиу. Ваквата информација дојде по шпекулациите во јавноста дека Митриновски веќе се испазарил да се повлече од челната позиција за да го задржи судското место.

На вчерашната средба со новинарите, Грчев негираше дека тој или некој друг член на Советот извршиле притисок врз двајцата судии. Тој објасни дека откако утре ќе бидат констатирани оставките на двајцата судии од скопска Апелација, ќе биде назначен и вршител на должност претседател од редот на судиите од истиот суд. Наследникот на Митриновски ќе се избере од оние кои што добиле највисоки оценки за време на последната проверка на работата на скопските апелациони судии во 2008 година. Грчев го оцени судот во глобала како „добар“, но, како што рече, подобри резултати покажале повеќемина граѓански судии што биле рангирани со „многу добар“, додека кривичарите, главно, со „добар“. На истата седница ќе биде распишан и оглас за избор на нов претседател на скопска Апелација.

В четврток ќе биде отворено и прашањето за одговорноста на Митриновски како судија, кое сега е во фаза на иницијатива од Врховниот суд, кога ќе биде одлучено да се формира и комисија која ќе го испита овој случај. Сепак, Грчев нагласи дека не смета оти утврдувањето на одговорноста станува беспредметно по оставката на другиот судија. Тој потсети дека со новите законски промени е внесена и новина, па во иднина во ситуации кога некој судија ќе даде оставка во време кога е почната формална постапка за утврдување на неговото нестручно и несовесно одлучување, тоа и ќе биде констатирано. (Г.Д.)