Буџетите на клиниките поголеми за 10 проценти

За наредната година скопските клиники ќе добијат за 10 отсто поголеми буџети за работа, и тоа за делот на болничко лекување на пациентите. За таа цел, Фондот за здравствено осигурување одобри дополнителни околу 2,7 милиони евра за потребите на клиниките, и тоа под превезот на сложени и комплицирани здравствени услуги. Со оваа финансиска инјекција Фондот, конечно, призна дека клиниките работеле со помали буџети од оние што им требаат. „Иако парите се даваат за тешки и комплицирани интервенции, дополнителните средства ќе може да ги користат клиниките за што сакаат“, рече директорката на ФЗО, Маја Парнарџиева-Змејкова. Во наредните три месеци клиниките ќе се борат за да добијат плус пари како резулатат на обемот и видот на извршените услуги. Долгот на клиниките за периодот 2009 година до септември 2010 година изнесува околу шест милиони евра. (Ј.Ј.)