Распишан конкурсот за наградата „Мито Хаџи Василев-Јасмин“

Од 4 септември до 4 октомври распишан е конкурс за доделување на државната награда „Мито Хаџи Василев Јасмин“ за 2009 година, со која се оддава признание за остварувања во областа на публицистиката и новинарството.

Наградата „Мито Хаџи Василев Јасмин“ се доделува на поединци, на група творци, екипи, установи, трговски друштва или на здруженија на граѓани, а под одредени услови може да им се додели и на странски државјани или институции. Во една година можно е да се дадат само две награди, а иницијатива или предлог за кандидатите до Министерството за култура можат да поднесат: установи, трговски друштва, здруженија на граѓани и граѓани.

Иницијативата или предлогот треба да содржат образложение, како и податоци за остварените резултати во одредената област, а треба да се достават во 15 примероци, додека книгите или публикациите во најмалку два примерока.

Наградата ја доделува одбор од 12 члена, чиј претседател годинава е познатиот новинар и публицист Борис Поп Ѓорчев. Врачувањето на оваа награда е предвидено за 21 декември, денот на раѓањето на Мито Хаџи Василев Јасмин, а таа се состои од диплома и паричен износ или од диплома и плакета ако се работи за установа, трговско друштво или здружение на граѓани. (С.У.)