МАТ ја обвини АЦВ за двојни аршини
Сања Наумовска
Агенцијата за цивилно воздухопловство треба да и' ја одземе дозволата за работа на компанијата „Стар лајн ерлајнс“, бидејќи еден од нејзините два каргоавиона оперира иако е приземјен, информираат од МАТ. Сепак, во АЦВ случајот се држи во тајност, што пак предизвикува сомнежи кои се мотивите за тоа, велат во МАТ, каде што нагласуваат дека со овој потег Агенцијата ги покажува двојните стандарди по кои постапува. Во спротивно, велат во компанијата, на АЦВ и' се закануваат санкции од европските воздухопловни власти кои можат да ја остават Македонија без домашниот цивилен воздушен регулатор.
На обвинувањата на МАТ, од Агенцијата, пак, одговараат дека случајот се пумпа за да се создаде притисок, бидејќи на „боингот“ од МАТ, кој се наоѓа на сервис во Белград, за неколку дена му истекува уверението за пловидба.
АЦВ минатата година, и покрај препораките на европските асоцијации дека нема капацитет да врши инспекција, на каргоавионите им дала дозвола за работа и биле заведени во домашниот регистар, обвинуваат од МАТ. Со тоа, според компанијата, АЦВ го направила првиот прекршок поради кој може да добие казна. Во меѓувреме, компанијата „Стар лајн“ не имплементирала ниедна безбедносна препорака што и' била побарана од Агенцијата, поради што еден од авионите бил приземјен. Сепак, тој продолжил да оперира се' додека не бил откриен од италијанските инспекции. Авионот, според МАТ, на мистериозен начин побегнал од аеродромот од Рим и моментно се криел во Израел. И покрај тоа, „Стар лајн“ се' уште нормално функционира.
Од АЦВ негираат дека каргоавионите се' уште оперираат. Според директорот Зоран Крстевски, авионот што бил инспектиран во Бреша, а не во Рим, од 25 мај е избришан од македонскиот регистар, бидејќи и инспекторите на АЦВ, исто така, констатирале недостатоци. Вториот авион на „Стар лајн“ исто така не е пловидбен и тој, всушност, се наоѓа на сервис во Израел. |
