Полемика за реформа на кривичното законодавство
Експремиерот и пратеник од СДСМ, Владо Бучковски, смета дека Македонија не е подготвена за реформа на кривичното законодавство, а јавната дебата што вчера се отвори во Собранието ја нарече фингирана.
„На Македонија и' се случува фатаморгана. Имаме пропагандна реформа, фингирана јавна дебата за законот за кривична постапка, а не од оние експерти кои две години го подготвуваа текстот на законот“, смета Бучковски. Според него, клучен проблем се партизираните судство и Јавно обвинителство.„Неефикасноста на правосудството не лежи во Законот за кривична постапка, туку во партизираните судство и Обвинителството. Македонија не е зрела за ваква реформа, а ако ја направите, ќе настане невиден хаос“, уверен е Бучковски.
Претседателот на скопскиот Апелациски суд, Јордан Митриновски, изнесувајќи го ставот на мнозинството судии, исто така, се спротивстави на системски или концепциски измени со кои длабоко се навлегува во таква суптилна материја и ги зафаќа правата на човекот. „Работната верзија на законот е враќање на еден систем што потсетува на време од 1947 до 1954 година. Ако кажеме дека ништо не му недостигаше на стариот ЗКП, ќе не' обвинат за неприфаќање на современите тенденции за промена на законодавниот систем, што не е така. Словенија го има поранешниот ЗКП на СФРЈ со одредени измени и не ја критикуваат дека е со застарени тенденции“, вели Митриновски.
Министерот за правда, Михајло Маневски, кој го образложи новиот закон за кривична постапка, потенцира дека ова е досега една од најголемите реформи на казненото право во Македонија. „Најголемата измена во работната верзија на законот е што истрагата преминува од истражниот судија во надлежност на јавниот обвинител, што значи раздвојување на функциите на прибавување докази и подигнување обвинение за кривично дело кое се гони по службена должност“, вели Маневски. (О.В.) |
