Англиски експерти за безбедноста во „Саса“

Иван Бојаџиски


Штип - Откако за девет месеци се случија три смртни случаи во јамите на рудникот за олово и цинк „Саса“, што никогаш порано го немало во неговата историја, менаџментот на рудникот одлучи да ангажира специјализирана консултантска компанија од областа на безбедноста во рудниците. На ова проблематика веќе една недела во рудничките јами работат експерти од англиската компанија „Глобал“, а нивната експертиза треба да придонесе во иднина да се избегнат вакви трагедии или, пак, тие да се сведат на најмала можна мерка.

„Иако сите надлежни во државата оценија дека несреќите со трагичен крај во нашите јами не се резултат на недостаток или на непреземање безбедносни мерки што со закон се пропишани, ценејќи дека таа состојба е загрижувачка, ние одлучивме да ангажираме компанија од Англија. Нејзините експерти во ’Саса‘ ги проверуваат сите прописи од областа на безбедноста, а нивна задача е да ги видат и проценат сите работни места во јамата каде што се врши откоп на руда. По нивните наоди ќе направиме комплетна ревизија на мерките за безбедност во нашите јами“, вели Максим Прохоров, директор за инвестиции и развој во „Саса“.

За зајакнување на безбедното работење во рудникот веќе се примени 13 нови работници што се специјализирани од областа на безбедност, а нивниот број дополнително ќе се заокружи на осумнаесет лица. Оваа безбедносна бригада ќе одговара за вкупната безбедност во рудникот. Вработените во неа редовно ќе ги проверуваат работните места каде што се копа рудата. Посебно внимание ќе се посвети на можноста за паѓање на карпи, што е најчеста причина за загинувањето на рударите.

Максим Прохоров вели дека нивниот рудник со оваа англиска компанија има соработка уште од 2005 година, откако нивната фирма „Солвеј“ ја купи „Саса“ и одново ја рестартира.

„Оваа компанија не' следи во севкупното работење веќе шест години. Таа врши анализи за сите процеси што се одвиваат во рудникот, почнувајќи од анализа на геолошките истраги, кои тука се одвиваат, па се' до фазите на безбедност во рудникот. Без нивна ревизија на нашите дополнителни рударски проекти за откоп на руда ние не тргнуваме во реализација на таквите проекти. Што се однесува до нивната експертиза на безбедноста во јамите, евентуалните укажувања сигурно ќе ги вградиме во секојдневните процеси на нашето работење“, потенцира Прохоров.

Инаку, со купопродажниот договор од 2005 година постои обврска да се вработат 920 работници, а во моментот бројот на вработени изнесува 724. Прохоров вели дека наскоро на работа ќе бидат примени уште 45 лица поради потребите, кои произлегуваат од новите геолошки истражувања.