Четврти Македонец на врвот на Монт Еверест

Скопјанецот Здравко Дејановиќ го развиори македонското знаме на највисокиот врв на светот

Миодраг Мицковиќ



По четврти пат во последните дваесетина години се развиори македонското знаме на највисокиот врв на светот Монт Еверест висок 8.848 метри. Вчера изутрина околу 9.30 часот по локално време скопјанецот Здравко Дејановиќ, член на Планинарското друштво „Бистра“успеа да се искачи на „покривот на светот“ од северната, од тешката страна. Искачувањето беше мошне тешко, во исклучително неповолни временски услови, со силен ветер и снег, но тоа не му попречи на Дејановиќ да го освои Монт Еверест.

Тој е ��етврти планинар од Македонија на кого му успеа овој своевиден подвиг. За првпат на Монт Еверест се искачи битолчанецот Димитар Илиевски-Мурато на 10 мај 1989 година, но по враќањето несреќно загина, остана засекогаш во белите прегратки на Хималаите. Дваесетина години подоцна д-р Глигор Делев, на 20 мај 2007 година, беше втор Македонец кој го освои Монт Еверест, а две години подоцна, на 19 мај 2009 година, тој подвиг му успеа на познатиот македонски кардиохирург, д-р Сашко Кедев.

И вчера, на 24 мај (сите искачувања се постигнати во ист месец), во историјата на освојувачите на Монт Еверест се запиша и Здравко Дејановиќ, инаку татко на две деца, роден на 25 мај 1965 година. Само еден ден му недостигаше да го прослави својот роденден на највисокиот врв на светот.

Според информациите што ги добивме од Планинарското друштво „Бистра“, Зравко Дејановиќ беше член на руска експедиција од Москва, предводена од Алекс Абрамов, која беше поделена во две групи и во Катманду се сретнаа на 7 април. Од таму тргнаа кон првиот базен логор на 5.200 метри. Вториот базен логор беше поставен на 6.300 метри и секојдневно членовите на руската експедиција заедно со Дејановиќ се искачуваа и до третиот логор поставен на 7.700 метри за подобра аклиматизација, но поради мошне лошото време мораа да се вратат во базниот логор на 6.300 метри каде минаа три дена очекувајќи да се подобри времето.

Кон врвот тргнаа од последниот логор поставен на височина од 8.300 метри. На Здравко Дејановиќ му беа потребни 12 часови искачување до врвот што беше проследено со силен ветер и снег, особено при самиот врв, но сепак со крајни напори тој успеа да се искачи на Монт Еверест развиорувајќи го македонското знаме. Не останал долго на врвот, според последните информации од неговото јавување, тој среќно успеал да се симне во базниот логор на 6.300 метри каде неколку дена ќе се одмора за да почне симнувањето до Катманду.

Здравко Дејановиќ е искусен планинар. Досега се има искачено на Елбрус (на Кавказ, 5.642 м, Аконкагва на Андите во Јужна Америка (6.962), го освоил и Мусад-Ата во Кина висок 7.546 м и сега како круна на неговата голема љубов кон височините успеа да стапне и на „покривот на светот“, Монт Еверест висок 8.848 м. Инаку Дејановиќ е приватен стопанственик и долгогодишен член на Планинарското друштво „Бистра“.