Затвор за 19 лица за изборни нерегуларности

ТЕТОВО - На 29 лица им се изречени затворски казни за предизвикани инциденти за време на предвремените парламентарни избори во 2008 година. Највисоката затворска казна изнесува четири години и 10 месеци, а оваа пресуда е веќе правосилна и се однесува за оружениот инцидент во Раковец, кога беше нападнато раководството на ДУИ што беше присутно на предизборен собир во селото. За шестмина затворскит�� казни се по три години, а еден доби двегодишна. Тројца добија по една година затвор, а по шест месеци се осудени уште петмина. На овој список треба да се додадат уште три условни казни и една парична.

Од вкупно 23 предмети против 82 обвинети што се водеа во Основниот суд во Тетово останати се уште само три случаи, кои се во завршна фаза на првостепената судска постапка. Според информации од Основниот суд во Тетово, поради недостиг на докази 15 лица биле ослободени уште во истражна постапка, а спрема 11 обвинението било повлечено. Од исти причини во судот биле донесени ослободителни пресуди спрема 20 осудени, а во два случаи обвиненијата се одбиени.

Тоа е епилогот од двегодишната судска постапка. На вонредните парламентарни избори во тетовскиот крај се случија повеќе инциденти што влијаеја на регуларноста, а завршија со кривични пријави за кривични дела спречување избори и гласање, злоупотреба и повреда на избирачко право, уништување избирачки исправи, непријавување кривично дело и сторител на кривично дело, неовластено поседување оружје и движење во близина на избирачки места. Меѓу обвинетите беа и двајца актуелни пратеници на ДУИ - Талат Џафери и Вулнет Амети.

Во првостепена постапка на Талат Џафери му беше изречена условна затворска казна од шест месеци. Обвинет беше за кривично дело учество во толпа и спречување службено лице во извршување службени дејства за инцидентот во предизборието на 29 мај 2008 година. Тогаш околу два часа симпатизери на ДУИ ја блокираа раскрсницата кај Монополот во Тетово. Бараа да бидат ослободени тројца нивни сопартијци, кои полицијата ги привела под сомнение дека нападнале момче кај спортскиот центар во Тетово. Во тој метеж беа нападнати биле двајца полицајци и оштетени две службени возила. За овој инцидент беа обвинети 10 лица, меѓу кои и пратеникот Талат Џафери. По жалба на осудениот Апелацискиот суд во Гостивар ја укинал првостепената пресуда и предметот е вратен на повторно судење.

За Вулнет Амети се водеше постапка дека заедно со уште седуммина други кај ОУ „Кирил и Методиј“ во Тетово сториле кривични дела спречување службено лице во вршење службена дејност и недозволено држење оружје. Во текот на судската постапка застапникот на обвинението поради недостиг на докази го повлече обвинението. За неколку од ослободителните пресуди Јавното обвинителство од Тетово има поднесено жалби кои се во тек на второстепена постапка. (Г.Е.)