ТЕТОВО - Демократската партија на Албанците е загрижена за ситуацијата во земјата која водела кон катастрофа. „Не сакаме да се случи најлошото, но ако не се растури оваа антиалбанска влада, ќе се растури Македонија“. Ова вчера на прес-конференција го изјави Имер Алиу, координатор на пратеничката група на ДПА, кој упати апел до САД, ЕУ и НАТО итно да интервенираат за да се спречи продлабочувањето на политичката и етничката криза кои со сигурни чекори води кон целосна дестабилизација“.

Алиу смета дека продолжила агонијата на антиалбанското прашање и на Албанците во Македонија. „Премиерот Груевски и Владата очекувано не се дистанцираа од енциклопедијата. Али Ахмети и ДУИ ставија печат на предавството со ненапуштање на оваа антиалбанска влада. Енциклопедијата ниту е повлечена ниту ќе се коригира некој нејзин дел. Две илјади примероци се разделени низ Македонија и милиони низ целиот свет“, загрижено констатира Алиу. Според него, енциклопедијата била производ на антиалбански менталитет. Имер Алиу ги повика Албанците да не потклекнуваат на антиалбански провокации, ветувајќи дека ДПА има сила, способност и знаење да го унапреди албанското прашање. (Г.Е.)