ВМРО-ДПМНЕ потстанар во музејот на Есма?

СДСМ пра��ува дали донацијата од 1,5 милион денари ќе се потроши за покривање на киријата

„Дали донацијата од 1,5 милион денари ќе се потроши за довршување на музејот на Стево и Есма Теодосиевски или за доуредување на штабот на ВМРО-ДПМНЕ, кој се наоѓа токму во овој објект на улицата ’Самоилова‘“, праша вчера Софија Куновска, координаторка на советничката група на СДСМ во Советот на Град Скопје.

Опозициските градски советници прашуваат од кога штабот на ВМРО-ДПМНЕ се наоѓа во куќата на Есма и колку пари плаќа месечно за кирија, изразувајќи притоа сомневање дека постои документација со која би се потврдило дека објектот е регистриран како музеј.

„Дали донацијата од градската каса е за неисплатена кирија и еден вид благодарност за лојалноста кон Груевски? Дали одговорните во фондацијата ’Стево и Есма Теодосиевски‘ имаат морал да примат донација од Градот, а во исто време да дозволат закуп на простории наместо сите средства да ги искористат за подобрување на општествениот статус на Ромите“, прашуваат од СДСМ.

Социјалдемократите се револтирани од ставот на Есма Реџепова-Теодосиевска, советничка во Град Скопје од редовите на коалицијата на ВМРО-ДПМНЕ, дека се чувствувала навредена од воздржаната реакција на СДСМ за доделување на парите за доизградба на музејот. Опозицијата се сомнева во искрените намери на мнозинството, како што велат, дури и кога се работи за наводно благородни иницијативи. Токму од тие причини сакале да бидат сигурни дека 1,5 милион денари ќе се потрошат за вистинска цел.

„Длабоко го почитуваме делото на Стево и Есма Теодосиевски и нивниот придонес во областа на музиката и хуманизмот, но сметаме дека ова е врв на лицемерство. Нивната досегашна работа не смее да биде ставена во партиски прегратки за да се сервисира ДПМНЕ со народни пари“, рече Куновска. (Б.А.)