Вкрстен оган врз Јакимовски за армиските станови

Градоначалникот на Карпош обвинет дека кочи голема инвестиција

Самостојниот синдикат на вработени во одбраната побара припадниците на Армијата да не бидат жртви на политичка конструкција, туку да се направи се' проектот „АРМ мој вистински дом“ да се реализира во најскоро време.

„Потценети од фактот што градоначалникот Стевчо Јакимовски не сака да не' прими 13 дена, омаловажени од неговиот игнорантски однос и навредени од неговите изјави со кои се потценува свеста на припадниците на АРМ, и денеска сакаме да кажеме дека политика не не' интересира. Ние кои достојно ја носиме македонската униформа и кои достојно ја претставуваме нашата држава не' интересира да бидат изградени нашите домови“, рече Ристо Ајтов, претседател на ССВО, на вчерашната прес-конференција.

Од Карпош експресно реагираа отфрлајќи ги сите обвинувања дека го кочат донесувањето на ДУП-от за касарната Илинден. „Општина Карпош ги поддржува сите проекти на Армијата, како што е проектот ’АРМ мојот вистински дом‘. Меѓутоа, претседателот на Самостојниот синдикат на одбраната ја избра политиката наместо струката. Му препорачуваме да држи прес-конференции пред Јавното станбено претпријатие, кое управува со 480 стана во државна сопственост и во кои е сместена една друга, партиска војска на ВМРО-ДПМНЕ“, е одговорот на Општина Карпош.

Случајот вчера го коментираа и министрите за одбрана и за транспорт и врски, Зоран Коњаноски и Миле Јанакиески. Коњаноски, исто така, побара да се деполитизира проблемот и да се направат напори да се најде решение за станбеното прашање на припадниците на АРМ, посочувајќи дека тоа не е можно со иселување на околу 400 диво вселени лица во државни станови. Јанакиески смета дека градоначалникот на Карпош кочи голема инвестиција во неговата општина.

„Го повикувам градоначалникот да ја започне јавната анкета за ДУП ’Илинден‘, бидејќи одговорно тврдам нема правни пречки за тоа. Сето земјиште што е слободно и нема да го користи одбраната е дадено на Општина Карпош за таа да го урбанизира“, рече министерот Јанакиески.

Агенција за катастар на недвижен имот, пак, демантираше дека Катастарот на кој било начин врши опструкција на проектот за изградба на армиски станови на територијата на општината Карпош. А реагираше и

Агенцијата за планирање на просторот со образложение дека не се точни забелешките на градоначалникот, а кои се однесуваат на она што е предвидено со планот. (Б.А.)