Доцнат и премиерот и неговите одговори

Премиерот Никола Груевски на седниците посветени на пратенички прашања доцни во просек по 40 минути. Писмените одговори од шефот на Владата и од министрите до пратениците патуваат повеќе од осум месеци.

Пратеникот од ЛДП, Андреј Жерновски, вчера во Собранието се чудеше како премиерот и неговиот Кабинет работат по 24 часа седум дена во неделата, а не можат да најдат време да одговорат на прашањата на пратениците. Тој вчера го праша спикерот Трајко Вељаноски што ќе преземе околу игнорантскиот однос на премиерот и на министрите кон деловничкиот рок од 20 дена за доставување одговори. Жерновски наведе неколку прашања до Груевски и до вицепремиерот, Васко Наумовски, на кои чека одговор повеќе од осум месеци. За истата работа Жерновски неодамна испратил и писмено укажување до спикерот.

Вељаноски соопшти дека до Владата веќе го доставил писмениот допис од пратеникот на ЛДП, како и списокот со сите неодговорени пратенички прашања и изрази надеж дека одговорите ќе пристигнат наскоро.

Претходно шефицата на пратеничката група на СДСМ, Цветанка Иванова, протестираше поради навиката на премиерот да доцни, поради што седниците почнуваат со 40-минутно задоцнување. Иванова, исто така, реагираше поради отсуството на дел од министрите, кои на седницата беа претставени со своите заменици. Пратеникот Илија Китановски од ВМРО-ДПМНЕ ја бранеше Владата дека е „репрезентативно претставена со присуството на премиерот, тројца вицепремиери и 12 министри“. (О.В.)