Гo гонеше Османи, сега го брани Тачи

Оние со подолго паметење ќе се сетат дека адвокатот Павлески во почетокот на деведесеттите години работеше како потсекретар во државна безбедност во МВР. Беше разрешен токму од таткото на актуелниот прв човек на ДБК, Сашо Мијалков. Во стручните кругови го паметат и од случајот „Паравојска“, кога како заменик на окружниот обвинител го бранеше обвинението. Во време кога беше прв човек на Обвинителството (1996-1999) му се случија ТАТ, атентатот врз Глигоров, апсењето на градоначалниците на Тетово и на Гостивар од редовите на ДПА, Алајдин Демири и Руфи Османи, поради непочитувањето на одлуката на Уставен суд околу знамињата на етничките заедници. Но, мора да се признае дека токму последниот случај доживеа и успешна проверка пред Европскиот суд за човекови права, кој го одби барањето на Османи, кој тврдеше дека му се повредени човековите права, со што се покажа одржливоста на обвинението што го товареше за поттикнување национална, верска и друга нетрпеливост. Тринаесет години по гостиварските настани Павлески стана адвокат на лидерот на ДПА, Мендух Тачи.