Претходен број

Црвенковски ја повика Европа да се посвети на решавање на спорот

Претседателот зборуваше на конференцијата „Предизвици и перспективи за Македонија”

Берлин - Претседателот Бранко Црвенковски ја повика европската зедница да се посвети на решавање на апсурдниот спор за името што Грција и' го наметна на Македонија.

„За разрешувањето на овој апсурден спор, кој реално во безбедносна и во стратегиска смисла отвора голема дупка на југоистокот на континентот, водечките европски земји треба да посветат поголемо внимание, точно да видат што претставува во целиот контекст општоевропски интерес и да ја промовираат логиката на помирување и заедничко гледање кон иднината“, укажа Црвенковски.

Тој вчера имаше обраќање на меѓународната конференција „Предизвици и перспективи за Македонија”, што во организација на фондацијата „Фридрих Еберт“ се одржа во Берлин.

Црвенковски во обраќањето изрази резервираност дека Македонија со тужбата поднесена против Грција пред Меѓународниот суд на правдата во Хаг може да ја постигне целта - да издејствува јужниот сосед во иднина да не ја попречува нејзината евроатланска интеграција. „Токму затоа мојот став за спорот околу името е дека Македонија треба да се обиде да направи фер компромис кој нема да го загрозува нашиот етнички, јазичен или културен идентитет и да се интегрира во евроатлантските структури“, изјави Црвенковски.

Според него, „сите други чекори, независно од нивната неоспорна легитимност, можат да значат губење драгоцено време“, што Македонија „не смее да си го дозволи во името на просперитетот на сегашните и идните генерации“.

„Без јасни евроатлантски перспективи ниту една балканска држава не може да напредува по најбитните прашања, а тоа се демократијата, економскиот развој и добрососедската соработка“, посочи Црвенковски во обраќањето на конференцијата во Берлин.

На меѓународниот форум посветен на Македонија учествуваа и вицепремиерот задолжен за европски прашања, Ивица Боцевски, евроамбасадорот Ерван Фуере, пратеници во македонското Собрание, германската пратеничка и претседател на Надворешно-политичкиот круг за разговорите за ЈИЕ, Ута Цапф.

„Секој процес, особено процесот на пристапување во ЕУ мора да се одвива според јасно дефинирани рокови - со почеток и крај“, нагласи вицепремиерот задолжен за европски прашања, Ивица Боцевски, во своето обраќање.

„Почнувањето на преговорите за членство во Европската унија ќе значи јасен политички сигнал за Македонија внатрешно, но и регионално. Од аспект на регионалното оп��ружување, сакам јасно да потенцирам дека ЕУ има потреба да го рефокусира своето внимание кон интегрирање на земјите од Процесот на стабилизација и асоцијација“, истакна Боцевски.

Пред учесниците го посочи и големиот успех што го постигна Македонија досега во однос на процесот на либерализација на визниот режим.

„Врз основа на досега постигнатото, сега е време Унијата да ги почитува своите заложби и да донесе политичка одлука со која ќе се овозможи префрлање на Македонија на белата шенген-листа и со која македонските граѓани ќе можат слободно да патуваат“, истакна Боцевски во обраќањето на конференцијата во Берлин. (МИА)