Поглед

Амбициите на Рамковски

Сашко Ѓ. Димовски

Велија Рамковски се надмина себеси и во јавноста упорно сака да се прикаже како all round играч. Ги среди состојбите во земјоделството, се просветли со културата, ги реши маките на млекопроизводителите, обезбеди пласман за откуп на родот на тутунарите и сега на ред му дојде спортот. Со така „успешни“ перформанси во неколку сегменти, Рамковски би бил дел од идеална петорка на сезоната во НБА-лигата или, во најмала рака, најдобар шести играч. Човекот има решение за се'. За него не постои нерешлив проблем. Утре можеби ќе посака да биде и претседател на Македонија.

Најсвежата амбиција на Рамковски е фудбалот. Таму не му оди како што замислил човекот на кого може да му позавиди и еден како Мекдоналдс од причина што гигантот за брза исхрана има помалку објекти низ светот отколку маркети „Хедис“. Затоа во погон ги стави своите медиуми (електронски и печатени) за задоволување на апетитите. Ќе го урива претседателот на ФФМ, Харалампие Хаџи Ристески. Му дал седум дена да си поднесе оставка. Притоа, додал дека ако не го стори тоа, ќе почнел јавни напади против него. Може да демантира колку сака, но здравиот човечки разум го толкува тоа така и никако поинаку.

Ако Рамковски толку многу сака да помогне во спортот, зошто не се насочи кон одбојката, пливањето, ватерполото и останатите федерации кои мака мачат за средства и едвај преживуваат за реализација на активностите впишани во нивните годишни програми, туку фрли око на финансиски најстабилната. И не е тешко да се претпостави која е причината. Примарна цел е контрола врз парите.

„На народот треба да му дајме забава“, рече Рамковски на промоцијата на новиот изглед на бесплатниот весник „Шпиц“. Така и треба да се сфати.