Спринт на директорот на УБК до докторска титула по економија

Четири дена откако стана магистер, Љупчо Тодоровски се пријавил за докторат по економија

Гордана Дувњак

Првиот човек на јавна безбедност (поранешно УБК) стана корисник на единствената стипендија за докторски студии што му ја додели Европскиот универзитет на Бојо Андревски на МВР. Зад оваа одлука застанала лично министерката за внатрешни работи, Гордана Јанкуловска, која за ова писмено ја известила универзитетската управа. Стипендирањето полициски кадри и тоа на додипломски, магистерски и докторски студии е предвидено со Протоколот за соработка што овие две институции го потпишаa пролетоска. Инаку, цената на докторските студии на овој приватен универзитет изнесува 5.000 евра.

Директорот на Бирото за јавна безбедност, Љупчо Тодоровски, ја одбрани магистерската титула на 27 август оваа година, а насловот на темата бил „Понови форензички приоди во истражувањето на појавните облици на наркокриминал во Македонија со посебен осврт на злоупотребата на дрогите од природно потекло во период 1997-2007 година“. Четири дена откако официјално стана магистер, првиот човек на јавна безбедност се појавил на Универзитетот за да ги запознае со својата намера да стане иден доктор на економски науки, а набрзо доставил и официјално барање за апликација.

Она што ја прави помалку необична целата оваа ситуација е што Тодоровски магистрирал од областа на безбедноста и криминологијата, а нецел месец подоцна, пројавил желба да стане научник од економските науки. Промената на областа и не би била некаков исклучок, но она што е најчудно е што тој нема објавено научни книги од областа на економските науки, што е еден од условите што ќе го цени Комисијата за оценување на подобноста на кандидатот и темата од апликацијата. Тричленото комисиско тело ќе треба да се убеди во мотивите на кандидатот, оправданоста на темата, како и за неговата сериозност како научник. Неофицијално се говори дека изборот на темата на која сака да работи Тодоровски е финансиски криминал.

Познавачите на оваа материја велат дека иако нема правила, сепак, вообичаено е да помине барем една година од одбраната на магистерскиот труд, па да се пристапи кон повисок научен степен. Тие потсетуваат дека на доставувањето на апликацијата за докторски студии треба да и' претходат големи истражувања и собран материјал. Брзањето на Тодоровски веројатно се должи и на потребата да го фати последниот воз пред промената на условите за студирање, кои стапија во сила на 15 септември оваа година. Според стариот закон, кандидатот пријавува тема, ја подготвува и ја брани, а сега докторските студии траат три години и предвидуваат слушање на предавања.

Токму пријавата на Тодоровски, но и на слични на неговата, била повод за искричења меѓу деканката на Факултетот за детективи и криминологија, Слаѓана Тасева, и универзитетската управа. На седница на Ректорска управа, таа побарала да се води сметка за процедурата, а во спротивно, најавила дека е подготвена да даде отказ. По две недели неплатено отсуство, Тасева по празникот, сепак, се појавила на работното место и одлучила да остане.

„Моето барање беше принципиелно. Истото тоа ќе го поставев како дилема и доколку работев на кој било друг универзитет. Немам ништо лично против Тодоровски, но побарав сите апликации, вклучувајќи ја и неговата, да се гледаат во законска процедура и со почитување на критериумите“, објаснува Тасева. Таа додава дека добила уверување оти ќе се случи тоа. Во случај да се отстапи од процедурата, вели дека е подготвена во секој момент да си замине од Универзитет.

Сопственикот на првиот приватен универзитет - Европски универзитет Бојо Андревски тврди дека нема спор со Тасева и таа останува на Универзитетот.

Што се однесува до изборот на Тодоровски да биде корисник на нивната стипендија, тој вели дека нивно било да ја доделат стипендијата, а МВР си одлучува кого ќе го предложи. „Секој во оваа држава може да поднесе апликација за докторат, дури и да има основно образование“, иронично коментира Андревски. За него не е спорно кој и за што се пријавил, па дури и тоа да го направил истиот ден, кога одбранил магистерска титула, туку дали ги исполнува критериумите.

„Не само Тодоровски, туку дури и да биде во прашање претседател на држава, доколку не ги исполни условите, нема да ја прифатиме неговата апликација или, пак, ќе ја вратиме на дополнување“, уверува Андревски. Тој тврди дека непотребно се подигнала тензија и оти гласиштата околу нивниот универзитет ги шири конкуренцијата. Тој негираше и дека немаат дозвола за докторски студии од Одборот за акредитација.

„Економскиот факултет постои веќе шест години и ги имаме добиено сите акредитации за повисоките циклуси за образование“, тврди Андревски. (Г.Д.)