ДУИ бара смена на Блаже Ристовски

Светлана Унковска

Блаже Ристовски да биде сменет од позицијата главен редактор, како и смена на целиот редакциски совет, потоа целосно повлекување и преработување на енциклопедијата, поради тоа што се спорни околу педесетина определници, а не само тематскиот дел каде што се опфатени Албанците.

Ова се само дел од барањата на Демократската унија за интеграција, кои не се согласуваат со козметичките измени што ги предлага академик Ристовски. Тој завчера истакна дека спорните определници нема да се повлечат, туку ќе бидат само „допрецизирани со по уште неколку зборови“. Тој, исто така, рече и дека во коригираната енциклопедија ќе го има терминот „Шиптари“, но ќе биде напишан на латиница, со објаснување дека Албанците сами се нарекувале така, а најави и дека ќе има промени и во делот за Али Ахмети.

„Блаже Ристовски нема никаков кредибилитет да остане на оваа позиција по неговата изјава дека ќе бидат потребни само мали корекции, па затоа сметаме дека тој треба да биде повлечен од првото место на редакцијата“, велат високи владини функционери од редовите на ДУИ. Истовремено се бара и изменетата енциклопедија да биде прво, а не второ издание, во неа да учествуваат и академици и историчари Албанци, но и не се откажуваат од барањето ВМРО-ДПМНЕ и премиерот Никола Груевски јавно да се дистанцираат од енциклопедијата, а Владата да заземе став дека во неа има бројни спорни определници. Ова ќе бидат барањата кои лидерот на ДУИ, Али Ахмети, ќе му ги испорача на премиерот Никола Груевски, со кого очекува да оствари средба деновиве.

Владиниот портпарол Мартин Мартиновски за „Утрински весник“ изјави дека „во текот на овој викенд средба меѓу премиерот Груевски и Али Ахмети не е планирана“.

Завчеравечер лидерот на партијата, Али Ахмети, итно го свикал партискиот врв и функционерите од ДУИ, но детали од оваа средба не се соопштуваат. Сепак, велат извори од партијата, останува и натаму подготвеноста на министрите на ДУИ, на одлука на нивниот лидер Али Ахмети, да ја напуштат Владата. (Св.У.)