Арачиновци бараат спас од фекалниот канал

Силна смрдеа се шири од фекалниот канал во Арачиново, при што постои голема опасност оттаму да се рашири епидемија на болести од загадените води што минуваат низ цела општина. Градоначалникот Бастри Бајрами е револтиран затоа што и по една година упорно тропање на вратите на министерствата, наидувал на, како што вели, „глуви уши“.

Арачиново, со околу петстотини куќи, секојдневно се соочува со ужасна миризба што на температура од над 40 степени ја задушува оваа скопска општина. Жителите што вчера излегоа на протести најмногу стравуваат за своите деца, кои играат во близина на каналот преполн со фекалии и обраснат со треви од каде што демне опасност и од змии.

„Средби имав во сите министерства и институции - со министерот за екологија, вицепремиерот и со премиерот, но наидовме на глуви уши. Откако станав градоначалник јас направив проект со целосно решение и го доставив до министерот за екологија. Досега имам поднесено над 20 барања, но нема никаков одговор. Во последно време дури и престанаа да контактираат со нас“, се жали градоначалникот Бајрами. Иако проблемот со овој канал е од поодамна, сепак, тој вели дека во последно време состојбата е неиздржлива.

„За да се реши проблемот со каналот потребни се околу 600 илјади евра, а Владата само за еден споменик потрошила 800 илјади евра. Ние во општината немаме средства, бидејќи годишниот буџет изнесува 300 илјади евра, од кои 70 проценти трошиме за образование“, додава Бајрами.

Посебна мака имаат жителите чии домови се веднаш до каналот, бидејќи честопати загадената вода им ги поплавува куќите.

„Ние како да не сме луѓе. Секој втор ден децата се разболуваат и постојано ги носиме на лекар. Минатата година поради излевањето на каналот во подрумот ми скапаа 1.500 килограми компири и затоа оваа година не насадив ништо“, се жали Асани Раман. До каналот се наоѓа и основното училиште „Скендер-бег“ во кое учат околу две илјади деца.

Доктор Билјана Ристевска од локалната амбуланта предупредува дека во летниот период многу деца се жалат на болки во стомакот. Најверојатно заболувањата се предизвикани од нечистотиите во фекалниот канал од Гази Баба, кој минува низ Арачиново и продолжува кон општина Илинден.

„Ако вообичаено имаме по четири-пет деца дневно, во последно време бројката на оние што се жалат на цревни заболувања расте и до 20 дневно. Ако минете крај каналот ќе почувствувате миризба што е опасна, бидејќи во Арачиново има голем број деца. Некои од нив завршуваат и на инфузија“, вели Ристевска која стравува дека со почнувањето на школската година бројот на заболени деца може да се зголеми. (Св.У.)