Лицата што постат да не работат на жешко

Директен престој на сонце и физич��а работа, посебно во најжешкиот период од денот, треба да се избегнува. По најавата за топлотен бран и температури и до 40 степени за време на викендот, Институтот за јавно здравје го препорачува ова за хронично болните и за децата. Посебно претпазливи треба да бидат граѓаните со муслиманска вероисповед, кои постат во овие денови. Епидемиолозите советуваат да се престојува во климатизирани простории или ако такви нема, да се оди во најблискиот трговски центар.

Препорака е да се носи облека во светли бои. При излегување од возило, да се отвори прозорец за да има вентилација и да не се остава никого во возилото.

Освен овие посебни мерки за жешко време, Институтот укажува и на општите превентивни мерки. Да не се консумира многу храна, да се избегнува мрсно јадење, а на менито да бидат застапени овошје и зеленчук, кои треба добро да се измијат. Екстремно ладни и алкохолни пијалаци треба да се избегнуваат, како и оние што содржат кофеин. Особено внимание треба да се обрне на консумацијата на производи што имаат краток рок на траење, како месни и млечни производи или оние што се подложни на расипување - сладоледи и разните видови слатки. (Ј.Ј.)