Отпуштените од Канал 5 ни на небо ни на земја

Отпуштените новинари од Канал 5 се најдоа во ситуација ни на небо ни на земја. И покрај тоа што дел од нив од 15 август треба да се појават на новото работно место во конкурентската телевизија А1, раководството на нивната сегашна телевизија се' уште тактизира и не им ги потпишува решенијата за отказ.

Сопственикот на телевизијата, Емил Стојменов, во моментов е на годишен одмор, со уредникот Иван Мирчевски комуницираат со СМС- пораки, а на прашањето кому да му се обратат вработените во телевизијата креваат раменици. До пред неколку дена првите луѓе на телевизијата им нудеа, како можност, спогодбено раскинување на работниот однос, но откако тие не се согласиле со ваква опција, од нив сега се бара сами да поднесат барање за раскинување на договорот за работа. Тоа не го прават, бидејќи, како што велат, тие сами не побарале да си заминат од телевизијата, туку им бил даден отказ.

„Доведени сме во многу непријатна ситуација, бидејќи мора да чекаме некој да ни го потпише решението за отказ, за да можеме да се пријавиме на новата работа“, вели Весна Коваческа-Трпчевска, една од отпуштените новинарки. Таа вчера испратила писмо до сопственикот на телевизија Канал 5, Емил Стојменов, во кое бара да и' се достави најавеното отказно решение. За она што и' се случуваше во изминатиот период писмено ги информирала и народниот правобранител Иџет Мемети, како и Детската амбасада „Меѓаши“, кои ги повикува да реагираат.

Во писмото до нејзиниот газда Стојменов таа го повикува да и' се достави отказното решение во најкраток можен рок.

„Дозволете да продолжиме натаму со нашите животи и со професионалниот ангажман. Доволно беа стресови. Не е в ред да си поигрувате со човечки судбини“, пишува Коваческа.

Револтираната Ковачевска смета дека во циничниот предлог од раководството на телевизијата да се грижи за нејзиното дете, бидејќи е самохрана мајка, има место за реакција и од Детската амбасада.„Дома, моето деветгодишно малолетно дете, ме праша: ’Мамо, а како телевизијата ќе се грижи за мене, јас сакам ти да се грижиш‘“, наведува таа.

Во преставката, пак, до македонскиот омбудсман Иџет Мемети, Коваческа го информира дека за состојбите во нивната телевизија и бара од него да ги заштити нејзините права и да го испита целиот случај.

Омбудсманот Мемети во изјавата за „Утрински весник“ ни потврди дека ја примиле преставката од н��винарката.„Немаме директна надлежност да постапуваме во овој случај, бидејќи станува збор за приватна компанија. Она што можеме да го направиме е целата документација да ја доставиме до Трудовата инспекција, а потоа од нив да побараме одговор што направиле“, вели Мемети. (Г.Д.)