Оставка во АЕК - семејни или други мотиви?

Агенцијата за електронски комуникации информира дека директорот на оваа институција, Петар Иваноски, планира да поднесе оставка на функцијата в понеделник. Оставката ќе ја достави до Комисијата на АЕК како највисок орган на Агенцијата.

„Поради најразличните шпекулации што излегоа во медиумите во текот на вчерашниот и денешниот ден, а со цел правилно информирање на јавноста, сакаме да појасниме дека причините за оставката се исклучиво од лична семејна природа“, се наведува во соопштението од АЕК.

Агенцијата апелира оставката на Иваноски да не се злоупотребува за дневно-политички цели.

Претходно, дел од медиумите во земјава информираа дека Иваноски се повлекува поради притисокот Агенцијата да купува државни записи, за што досега од сметката на АЕК во државната каса се слеале 17 милиони евра. (Ек.Р.)