Преку јапонски цреши до споменикот на Ченто

Малиот плоштад спроти бивш „Ловец“ од вчера остана без трафиките и такси-станицата, но не наменски, не за да се постави споменик, туку за да се изгради пешачка зона. Така тврдат од Општината Центар, по чиј налог од вчера потегот го окупираа багери и други градежни машини. Од изутрината турбо ги раскопуваа тротоарите и коловозот на улицата „Никола Вапцаров“, а уништени за миг беа и шесте паркинг места каде функционир��ше зонско паркирање.

Општинарите информираа дека го подготвуваат теренот за нова комбинирана пешачка зона кон плоштадот која првенствено ќе биде препознатлива по дрворед од јапонски цреши, како тие на улицата „Максим Горки“. Предвидено е целата улица да го смени сегашниот лик, и од цвеќарско уредување и од урбанистички аспект. Ќе биде поплочена, пешачка зона со природен гранит со дебелина од 6 сантиметри, а коловозот ќе биде прекирен со природни гранитни коцки. На улицата ќе има и нови дрвореди, како и клупи за седење, жардиниери и компелтно ново осветлување. „Улицата ќе добие целосно нов лик, а тоа е и намерата со проектот за пешачка зона, која е повеќе од потребна во овој реон. Такси-станицата и киосците нема да бидат вратени, но нема да се постави ни споменик на нивно место, иако така се шпекулира во јавноста“, рече вчера Лидија Неделковска од кабинетот на градоначалникот на Центар, Владимир Тодоровиќ. (Дс.Т.)