Улиците поплавени поради затнати шахти

Атмосферската мрежа ја има само на 30проценти од улиците и тоа во поновите населби

Песок, маснотии, комунален отпад, најлони и друго ѓубре, наместо вода течат низ атмосферската канализација во Скопје. Поради несовесните граѓани што чуваат песок на тротоар, мијат возила на улица, или кафеанџии што ги исфрлаат маснотиите директно во одводите, при неколкудневни дождови улиците н�� пливаат во вода.

Атмосферската мрежа ја има само на 30 проценти од улиците, и тоа во поновите населби Центар, Карпош, Аеродром. Градските власти најавуваат проекти за проширување на мрежата, особено на новите булевари што се во изградба. Исто така, ќе се дооформи и канализацијата кај клучката „Континентал“ со колектор до Вардар, а ќе се гради и една мрежа во Општина Чаир.

Сепак, сведоци сме дека и таму каде што ја има атмосферската канализација не функционира поради затнатите шахти. За проблемот се свесни и надлежните во Градот Скопје и во „Водовод и канализација“. Јавното претпријатие ги одржува шахтите, но понекогаш е немоќно поради несовесните граѓани. Од „Водовод“ велат дека можат да исчистат одвод, но не и да го казнат сторителот. Тоа е работа на комуналните инспектори, кои, пак, можат да напишат само прекршочна пријава.

„Екипите за одржување секојдневно ги контролираат шахтите од атмосферската канализација на критичните точки, како што се подвозниците, каде што може да дојде до поголеми поплави. Остатокот од мрежата се контролира еднаш месечно. Сепак, тоа не гарантира дека шахтите секогаш ќе бидат чисти, бидејќи ние немаме овластувања да предупредуваме или да казнуваме“, велат во „Водовод“. (С.Н.)