Повеќе пари за ученичкиот превоз

Приватните превозници бараат од Министерството за образование и наука да определи одреден износ што ќе им се исплатува по ученик за учество во бесплатниот превоз за средношколците од прва и од втора година. Приватниците се жалат дека според досегашната распределба на средствата месечно добиваат 150 денари по ученик. Велат дека е тоа неспоредливо со износот што го добива ЈСП, а е во висина на чинење на месечниот ученички билет. Приватните превозници сметаат дека треба да добиваат минимум 250 денари по ученик. Од „Слобода превоз“ објаснуваат дека токму тоа е и причината за доцнење на исплатата на средствата за изминатите месеци. Приватниците добиле само дел од парите за јануари, а се надеваат дека доцнењето ќе биде надминато и до крајот на јуни ќе ги добијат и последните средства за оваа учебна година.

„Изминатата година целосно ни беше исплатена, а сега исплатата доцни, бидејќи имаме спор околу висината на средствата. Добивме само дел од средствата и додека Министерството не го разгледа нашиот допис, со кој бараме да ни се исплатува минимум 250 денари по ученик, веројатно ќе ги почекаме останатите пари“, вели Ленин Јовановски, директор на „Слобода превоз“. (Сн.К.)