Судот ги гледаше снимките за поткуп во Општина Аеродром
Кирил Тодоровски
Со гледање на првиот од неколкуте снимени компакт-дискови снимени со примена на таканаречните посебни истражни мерки, вчера во Основниот суд Скопје 1 продолжи судењето на поранешниот градоначалник на Општина Аеродром, Ки рил Тодоровски, и на четворица негови соработници. Претходно Тодоровски побара копија од решението со кое се одобрува примената на посебните истражни мерки. Бранителот на обвинетата Ангела Зафировска, адвокатот Сашко Дукоски побара снимките и фотографиите да се издвојат од списите на предметот и тие да не влијаат при изрекувањето на пресудата. Дукоски побара јасно да се наведе против кого се насочени посебните мерки, бидејќи, како што рече „НН-лице не претставува законска форма“ и поради тоа што за оваа прилика бил употребен оштетениот Димитар Тодоровски, кој, пак, веќе беше распитан во својство на сведок.
Судот го отфрли предлогот, по што беше презентирано првото ЦД. Станува збор за снимка направена на 12 февруари годинава во кабинетот на тогашниот началник за урбанизам, Сашо Стојчески. Обвинетиот Стојчески и оштетениот Димитар Тодоровски цели 50 минути разговарале за објектот што го градела неговата фирма и само десетина минути се говори за предметниот поткуп. Од презентираното можеше да се слушне како оштетениот бара начин да разговара со градоначалникот Тодоровски за да ги плати бараните средства во висина од 100.000 евра и што ако не успее да ги обезбеди сите пари за една недела. Судењето продолжува утре. (Љ.С.) |
