Претходен број

Антикорупциска ги тресе и судиите

Антикорупциската комисија ги тресе и судиите. Од Судскиот совет побара да утврди одговорност за судија од Основен суд Скопје 1, кој ослободил од вина функционер за неподнесен анкетен лист за имотната состојба. Делителот на правдата се повикал на дипломатскиот имунитет на функционерот, иако имунитетот не важи за сопствената држава.

Иницијативата на антикорупционерите до Судскиот совет подразбира поведување постапка за утврдување нестручно и несовесно вршење судиска функција.

Во Државната комисија за спречување на корупцијата потврдија дека во непознавање на правото се истакнала судијката Станка Везенковска, а дека погрешната одлука се однесувала на поранешниот генерален конзул на Македонија во Торонто, Слободан Трајковски.

По поднесено барање на Атикорупциска за поведување прекршочна постапка против именуван функционер, судијата спротивно на Антикорупцискиот закон донел пресуда со која го ослободил обвинетиот од одговорност, рече на вчерашната прес-конференција претседателката на ДКСК, Мирјана Димовска. За овој прекршок во 2006 година била предвидена казна во висина од 20.000 до 50.000 денари.

„Од Судскиот совет се бара да го оцени вршењето на судиската функција, затоа што тој и' ја достави пресудата на Државната комисија речиси по една и пол година од нејзиното донесување. Законскиот рок за доставување е 15 дена“, изјави Димовска.

До надлежните судови се поднесени барања за поведување прекршочна постапка против четворица министри кои не поднеле анкетен лист по престанок на функцијата, Арификмет Џемаили, Аднан Ќахил, Живко Јанкуловски и Абдираман Мемети. Исто барање е поднесено и за Имер Алиу, кој не поднел анкетен лист откако ја променил функцијата, за двајца судии кои не поднеле анкетен лист по престанок на функцијата, за судија кој не поднел анкетен лист по стапување на функцијата, како и за градоначалник кој не поднел анкетен лист по престанок на функцијата, информираа во Антикорупциската комисија. Димовска соопшти дека од овој месец ќе профункционира поврзувањето на базите на Државната комисија и Управата за јавни приходи, со што се забрзува и поедноставува постапувањето по анкетните листови. (К.Ч.)