Ако продолжи да скока цената на горивото, ЈСП ќе го поскапи превозот

Ако и натаму цената на горивото расте, ЈСП „Скопје“ ќе мора да ја зголеми цената на јавниот градски превоз. Анализите што ги направиле во претпријатието покажале дека и сегашниов, иако минимален скок на цената на горивото им ги зголемил трошоците, што изминатиов месец биле за три милиони денари повеќе во однос на март. Цената на јавниот градски превоз не е зголемена последниве три, односно четири години. Во 2006 година билетот во еден правец на градските линии чинеше 30 денари, а во 2007 година поевтини за пет денари. Оттогаш наваму цената од 25 денари е непроменета.

Првиот човек на претпријатието, Мишо Николов, објасни дека ако во наредниов период цената на горивото продолжи да расте, тогаш ќе мора сериозно да се размислува за зголемување на цената на јавниот градски превоз. Со оваа најава, вели тој, не сакаат да ги подготват граѓаните, но евидентно е дека горивото учествува со 23 отсто во вкупните трошоци на претпријатието.

Статистичките податоци на претпријатието потврдуваат дека во 1994 и во 1995 година билетот чинел 20 денари, а потоа 1996 година се зголемил на 22 денари. По три години возењето во автобусите на ЈСП поевтинило на 15 денари, а во 2000 година повторно има скок на 18 денари. Веќе во 2003 година јавниот превоз поскапе на 25 денари и повторно по три години имаше зголемување за пет денари. Потоа во 2007 година превозот од 30 денари е намален на 25 денари.

Од претпријатието објаснуваат дека од аспект на трошоците возачите мора строго да внимаваат и на исполнувањето на возните редови, бидејќи секое задоцнување на кој било автобус за нив значи изгубени патници или неостварен приход. Автобуските линии „2“, „5“, „41“ и „57“ се најрентабилни во градската мрежа, а во приградската најмногу патници има на линијата број „31“ што сообраќа од Транспортниот центар до селото Лисиче. (Сн.К.)