Црвен крст на Скопје одбележува 65-годишнина

Црвен крст на Скопје со свечена академија и пригодни активност утре ќе ја одбележи 65-годишнината од формирањето. Академијата ќе се одржи во Куршумли-ан и е закажана за 20 часот. Организацијата пред присутните ќе се претстави со промотивен спот.

Во рамките на бројните активности планирани за јубилејот централно место ќе заземе показната вежба „Земјотрес“ на Единицата за одговор при катастрофи на Црвениот крст на Македонија и скопските тимови. Замислената вежба ќе биде изведена кај Камениот мост два часа пред одржувањето на свечената академија. Во импровизирани услови на земјотрес членовите од оваа единица ќе спасуваат и ќе евакуираат повредени, а потоа ќе ги згрижуваат.

Вежбата ќе биде поддржана од Министерството за одбрана, кое ќе се вклучи со армиски хеликоптер од кој ќе се спуштат двајца планинари. На Камениот мост ќе бидат поставени неколку повредени, меѓу кои и еден во потешка ситуација. Граѓаните ќе може да видат како ќе се згрижуваат повредените, а тешко повредениот со хеликоптерот ќе биде префрлен во воената болница.

Во исто време спасителите на вода ќе ги префрлаат повредените од едната до другата страна на реката Вардар и ќе спасуваат давеник, на кој потоа ќе му укажат прва помош. (Сн.К.)