Неплатената фирмарина го блокира бизнисот

Градот Скопје негира дека присилно наплатува долгови и за 2009 и 2010 година

Сања Наумовска


Сопственици на фирми се жалат дека Градот Скопје им ги блокира сметките поради неплатена такса за фирмарина и данок на имот за лани и за годинава. Со овој проблем особено се соочуваат помалите стопанственици, кои и така едвај преживуваат во услови на економска криза. Се жалат дека со блокирана сметка не можат да направат ништо, а се револтирани поради тоа што не им се дава можност до крајот на годината да ги регулираат давачките. За данокот на имот, велат тие, имаат можност да го платат и на рати, поради што им е несфатлив потегот зошто на половина година се блокира работата на фирмите.

Од Градот Скопје, пак, ги отфрлаат сите обвинувања дека блокирале фирми што должат за 2009 и за 2010 година. „Решенијата за данок на имот за годинава само што ги поделивме и е нонсенс дека веднаш ќе очекуваме да се платат“, информираат од Градот Скопје, дополнувајќи дека за фирмарината за 2009 година почнале да испраќаат опомени, но за блокирање сметки не станувало збор. Тврдат дека наплатата на данокот на имот никогаш не се обезбедувала со блокирање на сметки на фирми и оти овој начин нема да го користат ниту во иднина.

Во моментов градските власти очекуваат известување од банките колку фирми што во јануари биле блокирани, а потоа деблокирани платиле заостаната такса за фирмарина за 2007 и за 2008 година. Станува збор за околу 27.000 субјекти, односно повеќе од 60 проценти од фирмите регистрирани во Скопје, кои должат за повеќе од две години. Средствата што тие ги плаќаат Градот и општините ги делат во сооднос 60 : 40.

Фирмарината за трговски друштва изнесува 8.000 денари годишно, а за трговци-поединци 2.700 денари. Советот на Скопје на седницата во април одлучи да ги намали давачките. Така, од годинава место 8.000 денари ќе се плаќа 7.000 денари годишно, односно место 2.700 денари годишно, сега 2.400 денари.

„Градот Скопје ќе продолжи со присилната наплата на комуналната такса за фирмарина кон сите правни субјекти, кои и покрај речиси тримесечното продолжување на рокот не ја исполниле својата обврска за 2007 и за 2008 година. Истовремено ќе почне постапка за опоменување на субјектите што не платиле фирмарина за 2009 година. За нередовното плаќање на данокот на имот не се врши присилна наплата“, велат во Градот Скопје.