Син го убил татка си со тесла

За убиството на Симеон Серафимов (68) е осомничен неговиот син

Крваво убиство во Радовиш. Син го убил татка си со тесла, а се претпоставува дека причина за свирепиот чин се нарушените семејни односи, при што подолго време меѓу нив имало расправии и нетрпеливост.

Убиениот радовишанец Симеон Серафимов (68) вчераутро бил пронајден во семејната куќа на улица „Тоска Ангов” во Радовиш. Имал смртоносна повреда во главата, а до телото имало тесла, со која се претпоставува дека му бил одземен животот. Според првичните сознанија, смртта настапила на самото место. Трагедијата се случила завчеравечер, околу 22 часот, а случајот бил пријавен во 5 часот во полициската станица во Радовиш. Полицијата го приведе триесет и осумгодишниот В.С. за кој се сомнева дека го убил татка си.

Во него вчера се посомневаа и соседите на Серафимови. Тие велат дека таткото и синот подолго време имале нарушени семејни односи, што кулминирала пред четири месеци кога починала сопругата на Симеон. Оттогаш живееле сами во семејната куќа и таткото често бил напаѓан и тепан од синот.

„Често го тепаше. Па, и самиот се фалеше дека го тепал таткото. Викаше дека му скршил две ребра, а еднаш увото толку му го истегнал што добил голем оток. Го прашував зошто го тепа татка си? Тој велеше дека одбивал да зема храна од него. А и како би јадел кога синот постојано го тепаше“, вели Милојка Јованова, сосетка на Серафимови.

За нарушените односи меѓу синот и таткото зборуваат и другите соседи. Тие велат дека Симеон често се жалел дека синот го тепа.

Истрагата за случајот е во тек. Според портпаролот на судот во Струмица, Цона Каламерникова, телото на Симеон е предадено на обдукција и резултатите ќе покажат дали станува збор за убиство или за несреќен случај при паѓање врз остар предмет. Според неа, случајот во полицијата го пријавил синот на Симеон. (Е.П.)