Од понеделник нови и посовремени пасоши

Од идната недела граѓаните ќе добиваат патни исправи со новиот грб и со посовремен чип

Даниела Трпчевска

Кризата со обрасците за пасоши идната недела ќе биде надмината. Како што дознаваме, веќе в понеделник треба да пристигне новата пратка на бланко-документи, на кои освен што ќе биде втиснат новиот државен грб без петокрака, ќе содржат и пософистицирани чипови. Станува збор за втората пософистицирана генерација патни исправи, која, според надлежните, ќе отвори низа можности за надградување на системот.

Вработени во МВР тврдат дека проблемот со бланко-документите за печатење патни исправи настанал од пред две недели, кога поради недостигот од обрасци, приоритет за печатење добиле само итните патни исправи. Помошник-министерот за информирање, Иво Котевски, демантира дека имало проблем со обрасците за пасоши, тврдејќи дека печатењето се одвива без никаков застој. Според него, новата редовна пратка на бланко-документи за пасошите ќе пристигне за неколку дена. „Во понеделник треба да стигнат бланко-документите на кои ќе биде аплициран новиот државен грб. Тоа е видливата измена што ќе може да се забележи на новите пасоши. Што се однесува до промените кои не се видливи со голо око, во втората генерација пасоши ќе бидат вградени пософистицирани чипови, во кои покрај фотографијата, со новиот систем на заштита ќе бидат вметнати и отисоците на граѓаните“, вели Котевски.

Па така, објаснува тој, доколку Интерпол има распишано потерница по одредена личност или доколку некој учествувал во извршување на кривично дело, при проверка на неговата патна исправа веднаш ќе може да се идентификува лицето и по отисокот што го содржи чипот.

Ваквата напредна технологија од МВР тврдат дека ќе го чини поскапо министерството, но тоа нема да има влијание врз граѓаните, кои ќе ги плаќаат истите цени за вадење на новите документи како и досега.

„Ќе има период на тестирање на новиот систем и ќе бидат неопходни да се направат софтверски измени за системот да биде комплементарен со новите обрасци. Неопходно ќе биде да се инсталира и електронски клуч и да се обезбеди негова соодветна заштита, со цел да можат безбедно да се разменуваат информации за одредени лица со останатите пол��ции.

Со оглед на тоа дека биде потребно одредено време за да се имплементира системот во целост, процените се дека тој би можел да профункционира до крајот на годината. Дотогаш граѓаните ќе ги добиваат новите патни исправи, на кои ќе бидат внесувани нивните лични податоци и фотографии, а кон крајот на годинава во новите чипови ќе почне да се внесува и отисокот како задолжителен податок.

Засега личните карти остануваат да се издаваат со стариот државен грб на нив, бидејќи како што објаснуваат од МВР, имаат во залиха поголема количина на веќе отпечатени бланко-картички.

До почетокот на април 715.633 граѓаните се снабдиле со нови биометриски пасоши, додека 674.762 извадиле нова лична карта, која личи на кредитна картичка. Расте и интересот за замена на старите возачки дозволи, па така 219.947 граѓани аплицирале и извадиле нови дозволи.