Грчки хакери шират провокации против Македонија
Грчки хакери вчеравечер провалија во страницата на македонското Интернет- радио Стрит ФМ. Наместо стандардната Интернет-содржина за настани од клупската сцена, на Интернет-страницата на радиото беше испишан наслов „Научете си го името на земјата. Не лажете се, вие се викате ФИРОМ“. Насловот беше поткрепен со графичка илустрација од војник кој го вее грчкото знаме покрај антички храм. Титлата на прозорецот во кој се отвора Интернет-страницата, исто така, беше заменета со вулгарни зборови.
Менаџерот на Стрит ФМ, Далибор Мојсовски, тврди дека Интернет-радиото досега не било инволвирано и во предизвикување политички провокации.
„Целта на нашиот веб-сајт е да нуди информации за домашната и странската клупска сцена. Исто така, се трудиме да ги промовираме македонските диџеи низ светот, и си ја гледаме стриктно нашата работа која е во врска со музиката. Но, и покрај тоа, ние бевме вмешани во политички пресметки“ рече Мојсовски. (А.П.) |
