Претходен број

Штипјани реагираат на полициски притисок во нивните домови

Полицајците ги вознемирувале граѓаните поради сообраќајни прекршоци

Иван Бојаџиски

ШТИП - Педесетина граѓани на Штип од населбата Блок 70 реагираат на посетите на полицајци на нивните домови за време на викендите. Полицајци им доаѓале дома и од домаќините барале да им ги предадат сообраќајните дозволи поради сторени сообраќајни прекршоци. Граѓаните кои не' информираа за овие случувања, инсистираат на анонимност, бидејќи сметаат дека „од познати причини” овој чин на полицијата е всушност предизборен притисок.

„Немаме ништо против тоа полицијата да си ја врши работата на која со закон е обврзана, но протестираме поради тоа што униформирани лица тоа го прават на една недела пред изборите, што ние го доживуваме како притисок пред еден значаен ден каков што е денот на изборите”, велат дел од вознемирените граѓани, кои живеат во населбата која традиционално гласа за СДСМ.

Во СВР-Штип го потврдуваат настанот, но тврдат дека не станува збор за никаков притисок, туку дека станува збор за извршување законска обврска која поради неодговорноста на граѓаните, полицијата мора да ја спроведе на ваков начин.

„Полицијата има список со имиња на 250 штипјани кои добиле судски решенија за направен сообраќаен прекршок и согласно со законот тие биле обврзани сообраќајните дозволи сами да ги однесат кај референтот за сообраќај. Бидејќи и по неколкуте опомени не го сториле тоа, немавме друг избор освен да ги пратиме нашите луѓе да им ги побараат сообраќајните дозволи и да ги донесат во сообраќајното одделение каде што ќе им бидат запишани прекршоците. Некои од нив тоа го сторија сами, а полицајците ги посетија само оние кои не постапија така”, ни изјави Снежана Санева, портпаролка на СВР-Штип.

Станко Стефановски, командир на сообраќајната полиција вели дека се работи за редовни законски активности. „Посетени се домовите на лица кои сториле сериозни прекршоци во однос на безбедноста на сообраќајот, како што се возење во алкохолизирана состојба, пребрзо возење и учество во сообраќајни инциденти. Во Општина Штип има над 12.000 возила, при што не е мал бројот на учесниците во сообраќајот кои не ги почитуваат законите. Наше е да ставиме ред во сообраќајот, согласно со законските прописи. Минатата недела голем број возачи возеа под дејство на алкохол поради матурските вечери, а на петмина млади луѓе им ги одзедовме возачките дозволи поради управување во алкохолизирана состојба. Граѓаните кои реагираат требало да ја исполнат својата граѓанска обврска и по добиеното судско решение да ги донесат своите возачки дозволи во сообраќајното одделение. Уште еднаш сакам да потврдам дека не станува збор за никакви притисоци, туку полицијата само ги спроведува своите законски обврски во сферата на безбедноста на сообраќајот”, вели Стефановски.