Битка за Маневски во Собранието

Опозиционерите гледаат во министерот за правда човек чии раце се окрвавени од политички егзекуции

Оливера Војновска

„Камелеон“, „џелат“ и „гробар“ на македонското судство, „криминално-политички муџахедин“... Овие термини ги употребуваше опозицијата вчера за да го долови „ликот и делото“ на министерот за правда, Михајло Маневски, за чија интерпелација Собранието расправаше цел ден. Опозиционерите го гледаат во Маневски човекот „чии раце се окрвавени од политички егзекуции“. Од говорницата во парламентот му порачаа дека ќе дојде денот кога тој ќе одговара за своите „злосторства“.

Маневски ги отфрли нападите уверен дека се од лична природа и се должат на нервозата кај опозиционерите поради неговата решеност да се справи со корупцијата и организираниот криминал. И пратениците од владејачката ВМРО-ДПМНЕ што го бранеа Маневски токму тука ги гледаат мотивите за интерпелацијата која ја поднесоа 23 пратеници од опозицијата.

Социјалдемократите побараа Маневски да си поднесе оставка зашто македонското судство во негово време го „допрело дното и станало најпроблематичен сегмент во државата“. Го обвинуваат Маневски за политички притисок врз судиите, непотизам, неправилности во финансиското работење на Министерството за правда, за скандалите со узурпирано земјиште во општествена сопственост, аферата и плата и пензија, незаконско трошење 200 илјади евра...

Поранешниот премиер, пратеникот од СДСМ, Владо Бучковски, рече дека „министерот за неправда“ 45 години е присутен во правосудството, па најмногу му одговарал „псевдонимот камелеон“. Читајќи дефиниција за камелеон, додаде дека ја менува бојата на кожата во зависност од околината. „Од црвена преку сина, Маневски денеска има портокалова боја“, нагласи Бучковски. Според него, методите што ги применувал министерот за правда ги немале така разработено ниту болшевиците.

Притоа, ги посочи критериумите за избор на кандидати во Академијата за судии и јавни обвинители, кои треба да го поминат, покрај другото, и тестот за морално-етички квалитети. Селекцијата ќе се прави на правно-релевантен начин со анкетирање 50 личности кои имаат најмалку средно образование и кои со кандидатот не се во роднински врски до трета-четврта линија, ниту, пак, во сватовски релации! Бучковски вчера го праша Маневски дали знае кој ги прислушува обвинителите и го обвини за „судската елиминација на либерални директори, на истакнати правници, судии, обвинители, адвокати, поради лична или семејна нетрпеливост“.

За поранешниот премиер запрепастувачки е фактот што „секој член на Судскиот совет има досие и дека се уценувани членови на СС кои биле поранешни претседатели на основни судови“. Завршувајќи го својот говор, Бучковски рече: „Во лустрацијата беше лесно да ги бараме кодошите, овде имаме директно замешан човек кој до лакти има окрвавено раце со политичките егзекуции што ги има правен�� во периодот на претходниот систем“.

Во сличен тон беа и дискусиите на неговите сопартијци, пратениците Емилијан Станковиќ и Игор Ивановски. Станковиќ често пати се прашувал кој е мотивот на Маневски на неговите 73 години да биде „синонимот за антиевропска Македонија“. Исто така, размислувал за тоа зошто премиерот Никола Груевски водел „мазохистичка политика и по секоја цена го држел Маневски во Владата“? Станковиќ го најде одговорот во приказната со четирите стана. Односно, како што објасни тој, „улогата на Маневски, како тогашен претседател на Антикорупциската комисија, за забошотување на најголемиот корупциски скандал“.

Нарекувајќи го Маневски „криминално-политички муџахедин“ и „џелат“ во судството, Ивановски му предвиде дека кривично ќе одговара за сето тоа што го направил изминативе четири години во правосудството. Тој го праша Маневски „во која нормална држава министерот му се јавува на судијата и му диктира судска пресуда“. Според него, Маневски им се јавувал и на повеќе стечајни управници за да ги ликвидираат фирмите, за потоа тие да отидат кај „фамилијата“. Тој го критикуваше министерот и за изборот за непотизам и избор на судии по партиски клуч. „Некои немаат напишано ниту една прекршочна пријава, а носат одлуки за притвор. Тоа е исто како вие сега да возите ’Формула 1’“, се изрази сликовито Ивановски.

Вчера не изостанаа ниту критиките на адреса на сопругата на министерот, судијката во пензија Филимена Маневска. Пратеникот Бучковски ја посочи како „прв судија фотографиран во партиски штаб“.

Маневски ги оквалификува нападите како тенденциозни и невистинити. Отфрлајќи ги наводите дека 45 години бил на високи функции, тој рече дека во почетоците на плурализмот едно време бил на апанажа, па 1,5 година бил без работа, а потоа бил во Владата.

„Не сум бил на моќна функција, туку советник од најнизок ранг во Владата. Тоа се глупости, невистини. Срамота“, рече Маневски. Тој е убеден дека опозицијата намерно ги искривува фактите за неговата работа. „Евидентно е дека колку се поголеми резултатите на Министерството за правда и мојата работа, толку се поголеми и неосновани нападите. Лажно е прикажано сработеното досега, но тоа се афери од познатите кујни. И тоа нема да ме поколеба да продолжам со судските реформи“, рече Маневски. Тој се повика на извештајот на ЕК, каде што, како што рече, првпат позитивно се оцените судските реформи. „Во извештајот се наведува дека е постигнат напредок во имплементацијата на судските реформи, во обезбедување на независноста на судството“, додаде Маневски.

Притоа, посочи каде ги гледа мотивите за интерпелацијата. „Корупцијата е мотото на мојата интерпелација. Тие што спроведоа во огромни размери најкриминална приватизација, што ги ограбија фабриките, претпријатијата и штедилниците и што ги избркаа работниците на улица, сега на сите страни гребат да набедат други за тоа“, заклучи Маневски. Обвинувањата за тоа дека земал министерска плата и пензија ги оцени како невистинити и додаде дека за четири месеци не подигнал каков било износ за пензија.

Пратеникот Илија Димовски од ВМРО-ДПМНЕ смета дека интерпелацијата содржи само лични навреди и напади за министерот Маневски и оти таа е мотивирана од лични причини на некои политичари од СДСМ.Според него, во последниве години е направен голем прогрес во судството. „Во изминативе четири години е направен напредок во судските реформи како за десет години. Состојбите се драстично подобрени откога СДСМ беше на власт. Министерот за правда е еден од клучните луѓе за борба против корупцијата“, смета Димовски.

Расправата за интерпелацијата според Деловникот треба да заврши до полноќ. (О.В.)