Братислав Ташковски со „Расцепен ум“ ја затвори трилогијата
Познатиот македонски поет и романсиер Братислав Ташковски го објави новиот роман „Расцепен ум“, со кој ја затвора својата трилогија објавена во прозната едиција на издавачката куќа „Макавеј“, а во рамките на која претходно веќе ги издаде „Ако даде Господ“ и „Кафез од гревови“.
Литературниот критичар Данило Коцевски во препораката за „Расцепен ум“ ќе напише дека со ова дело Ташковски го продолжува своето книжевно мајсторство низ тема од постреволуционерното турбулентно време во Македонија, кога конфликтните ситуации и идеолошките недоразбирања доведуваат до своевиден климакс.
Поетот Славе Ѓорѓо Димески, пак, вели дека во ова дело на еклатантен начин е раскажана македонската безнадежност како судбина, која беше наметната во минатиот век. Додека Лорета Георгиевска истакнува дека во овој роман се портретира една приказна за приказните, со што се постигнува и новите и старите приказни да се надополнат на таков начин на кој го прикажуваат континуитетот и недоразбирањата во македонската историја, најчесто олицетворени преку омразата и не-љубовта.
Братислав Ташковски е автор на десетина поетски книги и на повеќе публицистички дела, а сега со оваа трилогија се наметна и на полето на македонскиот роман. (С.У.) |
